សៀមរាប៖ព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម បានបន្លឺសម្លេងចេញដំណើរហើយ ដោយសកម្មភាពជាដំបូងនៅព្រឹកថ្ងៃទី២០ ខែមីនា ឆ្នាំ២០២៣ គឺមានរៀបចំពិធីក្រុងពាលីនិងបួងសួង តាមបែបសាសនា ដើម្បីសុំភ្លើងអាទិទេព សម្រាប់ព្រឹត្តិការណ៍ស៊ីហ្គេមលើកទី៣២(32nd SEA Games) និងអាស៊ានប៉ារ៉ាហ្គេមលើកទី១២ (12th ASEAN Para Games) នៅខាងមុខប្រាសាទអង្គរវត្ត។
ពិធីនេះប្រារព្ធឡើង ក្រោមអធិបតីភាពប្រធានក្រុមប្រឹក្សាសហព័ន្ធកីឡាអាស៊ីអាគ្នេយ៍ និងជារដ្ឋមន្ត្រីក្រសួងទេសចរណ៍ ឯកឧត្តមបណ្ឌិត ថោង ខុន លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា ឯកឧត្តមខៀវ កាញារីទ្ធ រដ្ឋមន្ត្រីក្រសួងព័ត៌មាននិងលោកបណ្ឌិត ហង់ ពៅ អគ្គនាយកនៃអាជ្ញាធរជាតិអប្សរាព្រមទាំងអ្នកមុខ អ្នកការជាច្រើនរូបទៀត។
កម្ពុជាបានរៀបចំពិធីប្រុងពាលីនិងបួងសួង តាមបែបសាសនា ដើម្បីសុំភ្លើងអាទិទេពនេះគឺក្នុងនាមជាម្ចាស់ផ្ទះដែលនឹងរៀបចំការប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេម លើកទី១២នាពេលខាងមុខ។ជាមួយគ្នានេះដែរ កម្ពុជាក៏បានចាប់ផ្តើមរៀបចំ ព្រះរាជពិធីសុំព្រះអគ្គីកីឡា ពីព្រះអាទិទេព សម្រាប់ការប្រកួតកីឡាអាស៊ីអាគ្នេយ៍ និងកីឡាអាស៊ានប៉ារ៉ាហ្គេម នៅថ្ងៃទី២១ខែមីនា ឆ្នាំ២០២៣ នៅប្រាសាទអង្គរវត្តក្រោមព្រះរាជាធិបតីដ៏ខ្ពង់ខ្ពស់របស់ព្រះករុណាជាអម្ចាស់ជីវិតលើត្បូងព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាព្រមទាំងរៀបចំពិធីរត់ដង្ហែព្រះអគ្គីកីឡានេះ នៅតាមបណ្តាប្រទេសមួយចំនួនក្នុងតំបន់អាស៊ាន និងនៅតាមបណ្តាខេត្តមួយចំនួន ក្នុងប្រទេសកម្ពុជាផងដែរ៕
