ភ្នំពេញ៖រថយន្តតូយូតាព្រូស បានបើកបុកម៉ូតូកំពុងឆ្លងផ្លូវពេញទំហឹង បណ្ដាលឱ្យស្ត្រីម្នាក់ស្លាប់ភ្លាម ហើយរថយន្តបង្កបន្តទៅបុករបាំងថ្មចែកផ្លូវខូចខ្ទេចមួយកំណាត់មុខ។ហេតុការណ៍នេះបានកើតឡើងនៅតាមផ្លូវជាតិលេខ២ ក្នុងសង្កាត់ចាក់អង្រែក្រោម ខណ្ឌមានជ័យ កាលពីព្រឹកថ្ងៃទី១៨ ខែមីនា។
មន្ត្រីនគរបាលចរាចរណ៍បានឱ្យដឹងថា ស្ត្រីបាត់បង់ជីវិតឈ្មោះ ធូ សុធារី អាយុ៥៣ឆ្នាំ ជាស្ត្រីមេម៉ាយ និងមានកូនប្រុសស្រី៣នាក់ លក់នំគូឆាយនៅផ្សារអូឡាំពិក។
មុនកើតហេតុ គេឃើញស្ត្រីរងគ្រោះជិះម៉ូតូម៉ាកហុងដាឌ្រីមផ្លាកលេខភ្នំពេញ 1CB-2290 ចេញពីផ្លូវជិតផ្សារក្រមួនពីលិចទៅកើតនិងបានបត់ឆ្លងផ្លូវ។ពេលបត់ដល់ពាក់កណ្តាលផ្លូវ ស្រាប់តែមានរថយន្តម៉ាកតូយ៉ូតាព្រូស ផ្លាកលេខភ្នំពេញ2BA-3203 បើកតាមផ្លូវជាតិលេខ២ក៏ជ្រុលទៅបុកម៉ូតូពេញទំហឹងបណ្ដាលឱ្យស្ត្រីរូបនោះស្លាប់ភ្លាម។ រីឯរថយន្តបង្កបានរេចង្កូតទៅបុករបាំងថ្មចែកផ្លូវខូចខ្ទេចមួយកំណាត់មុខ។
បន្ទាប់មកកម្លាំងនគរបាលខណ្ឌមានជ័យ បានឃាត់ខ្លួនអ្នកបើកបរ ហើយយកម៉ូតូនិងរថយន្ត ទៅប៉ុស្តិ៍នគរបាលរដ្ឋបាលសង្កាត់ចាក់អង្រែក្រោមដើម្បីបន្តនីតិវិធី៕ដោយ៖វិចិត្រ
