អ៊ុយក្រែននិយាយថា បើអាចទប់ទល់សមរភូមិក្រុងបាក់មុតខេត្តដូណេតបាន នោះនឹងមានសង្ឃឹមអាចឈ្នះរុស្ស៊ីក្នុងសមរភូមិកន្លែងផ្សេងៗទៀតក្នុងសង្រ្គាមដោយងាយស្រួល។
លោក Valerii Zaluzhny ជាអគ្គមេបញ្ជាការនៃកងកម្លាំងប្រដាប់អាវុធអ៊ុយក្រែន បានបង្ហាញការជឿជាក់ថា ការការពារទីក្រុង Bakhmut ទប់ទល់នឹងរុស្ស៊ី គឺជាគន្លឹះដ៏សំខាន់បំផុតសម្រាប់ស្ថិរភាពនៃរណសិរ្សទាំងមូល។ លោកបាននិយាយតាមហ្វេសបុកថា “ខ្ញុំគោរពនូវកម្លាំង ភាពក្លាហាន និងភាពមិនអាចកាត់ថ្លៃបានរបស់ទាហានយើងនៅបាក់មុត។ ប្រតិបត្តិការការពារក្នុងទិសដៅនេះ គឺសំខាន់បំផុតសម្រាប់រារាំងរុស្ស៊ី”។ “វាជាគន្លឹះសម្រាប់និរន្តរភាពនៃការការពារជួរមុខទាំងមូល”។
គិតមកទល់នឹងពាក់កណ្តាលសប្តាហ៍នេះ គេនៅតែមិនទាន់ដឹងច្បាស់ថា អ៊ុយក្រែន មានសន្ទុះប៉ុនណាក្នុងការបន្តទប់ទល់នឹងរុស្ស៊ី ខណៈក្រុងបាក់មុតគឺជាចំណុចខ្សែបន្ទាត់ប្រសព្វខានមិនបាននៃខេត្តដូណេត ជាចំណុចឆ្អឹងខ្នងសំខាន់ជាទីបំផុតនៃឧបទ្វីបភាគខាងកើត៕
ប្រភព៖France24
ប្រភពរូប៖France24
ប្រែសម្រួល៖សុខ តុលា
