ប្រធានាធិបតីអ៊ុយក្រែន លោកហ្សេឡិនស្គី ព្រមទាំងមេបញ្ជាការកំពូលៗ បានអនុញ្ញាតយល់ព្រមឲ្យកងកម្លាំងរបស់ខ្លួននៅបន្តទប់ទល់ទីក្រុងបាក់មុតខេត្តដូណេត ស៊ូមិនចុះចាញ់រុស្ស៊ីឡើយ។
ការិយាល័យប្រធានាធិបតីបាននិយាយនៅយប់ថ្ងៃអង្គារ ទី១៤ ខែមីនាថា Zelenskyy និងមេបញ្ជាការយោធាកំពូលៗរបស់គាត់បានយល់ព្រមព្រៀងគ្នាថា នឹងនៅបន្តការពារ Bakhmut តទៅមុខទៀត។ កិច្ចប្រជុំនេះមានការចូលរួមពីប្រធានាធិបតី មន្ត្រីរដ្ឋាភិបាលកំពូល និងមេបញ្ជាការយោធា។ ការិយាល័យបាននិយាយថា “បន្ទាប់ពីបានពិចារណាលើប្រតិបត្តិការការពារក្នុងទិសដៅ Bakhmut សមាជិកទាំងអស់បានបង្ហាញជំហររួមដើម្បីបន្តកាន់កាប់ និងការពារក្រុងបាក់មុត”។
គិតត្រឹមយប់ថ្ងៃអង្គារទី ១៤ ខែមីនា មិនទាន់មានសេចក្តីរាយការណ៍ពីចំណុចរបត់ថ្មីណាមួយរបស់ទាហានស៊ីឈ្នួលរុស្ស៊ីនៅបាក់មុតឡើយ។ ការប្រយុទ្ធនៅតែកំពុងបន្ត។
ប្រធានាធិបតីពូទីននៅថ្ងៃជាមួយគ្នាបានមានប្រសាសន៍ថា “សម្រាប់យើង យើងមិនមែនធ្វើកិច្ចការភូមិសាស្ត្រនយោបាយទេ ប៉ុន្តែវាជាភារកិច្ចនៃការរស់រានមានជីវិតនៃរដ្ឋ រុស្ស៊ី បង្កើតលក្ខខណ្ឌសម្រាប់ការអភិវឌ្ឍអនាគតរបស់ប្រទេស និងកូនចៅរបស់រុស្ស៊ី”៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
