បាត់ដំបង៖សមត្ថកិច្ចបានចុះបង្ក្រាបបទល្មើសល្បែងស៊ីសងប្រភេទជល់មាន់ខុសច្បាប់ និងឃាត់ខ្លួនមនុស្ស៧នាក់នៅតំបន់ព្រំដែនស្រុកភ្នំព្រឹក ហើយបានបញ្ជូនទៅតុលាការ។
មន្ត្រីនគរបាលបានឱ្យដឹងថា កម្លាំងនគរបាលស្រុកភ្នំព្រឹក កាលពីរសៀលថ្ងៃទី១៤ ខែមីនា បានចុះបង្ក្រាបករណីលេងល្បែងស៊ីសងប្រភេទបញ្ជល់មាន់។ក្នុងនោះបានឃាត់ខ្លួនអ្នកប្រព្រឹត្តចំនួន៧នាក់ នៅត្រង់ទីលានសម្ងួតដំឡូងក្នុងភូមិបួរ ស្រុកភ្នំព្រឹក ខេត្តបាត់ដំបង។
ក្នុងការបង្ក្រាបបទល្មើសខាងលើ សមត្ថកិច្ចដកហូតវត្ថុតាងបានមួយចំនួនដូចជា សំពត់កៅស៊ូសង្វៀនមាន់១ដុំ-មាន់ជល់១០ក្បាល-លុយចំនួន៥៦០.០០០រៀល-ម៉ូតូ៣គ្រឿង-រួមទាំងសម្ភារពាក់ព័ន្ធបទល្មើសមួយចំនួន។
ក្រោយពីឃាត់ខ្លួនជនសង្ស័យជាមួយវត្ថុតាងរួចមក កម្លាំងជំនាញបានកសាងសំណុំរឿងបញ្ជូនទៅតុលាការដើម្បីអនុវត្តតាមច្បាប់៕ដោយ៖ព្រះអង្គខ្មៅ
