ភ្នំពេញ៖តុលាការភ្នំពេញ ព្រឹកថ្ងៃទី១៥ ខែមីនា បានផ្តន្ទាទោសបុរស២នាក់ខ្មែរនិងថៃម្នាក់ដាក់ពន្ធនាគារម្នាក់ៗមួយជីវិត ករណីដឹកជញ្ជូនគ្រឿងញៀនជាង២៤គីឡូក្រាមនិងពិន័យម្នាក់ៗ៦០លានរៀលបង់ចូលថវិការដ្ឋ។
សមត្ថកិច្ចបានឱ្យដឹងថា បុរសជាប់ចោទឈ្មោះ គឹម សំភោគ អាយុ ៣៨ឆ្នាំ និងឈ្មោះ ប្រាក់ សឺត អាយុ ៥៤ឆ្នាំ ជនជាតិថៃ។ទាំង២នាក់ជាប់ចោទពីបទរក្សាទុក ដឹកជញ្ជូន ជួញដូរគ្រឿងញៀននិងកាន់កាប់អាវុធខុសច្បាប់ ។តាមមាត្រា៤០និងមាត្រា ២០ នៃច្បាប់ស្តីពីការត្រួតពិនិត្យគ្រឿងញៀន និងច្បាប់ស្តីពីការគ្រប់គ្រងអាវុធគ្រឿងផ្ទុះនិងគ្រាប់រំសេវ។
សូមរំលឹកថា កាលពីរសៀលថ្ងៃទី១៨ ខែសីហា ឆ្នាំ២០២១ កម្លាំងមន្ទីរប្រឆាំងគ្រឿងញៀន ក៧ បានចាប់ជនសង្ស័យទាំង២នាក់ នៅ២គោលដៅផ្សេងគ្នាជាបន្តបន្ទាប់។ទី១-តាមផ្លូវជាតិលេខ៦A សង្កាត់ព្រែកលៀប ខណ្ឌជ្រោយចង្វា និងទី២-ក្នុងភូមិប្រការ សង្កាត់ព្រៃស ខណ្ឌដង្កោ ខណៈពួកគេបានបាញ់តដៃជាមួយសមត្ថកិច្ចផងដែរ៕ដោយ៖វិចិត្រ