ភ្នំពេញ៖រថយន្តទំនើបម៉ាកឡិចស៊ីស មានបិទឡូហ្គោសារព័ត៌មានCTC បើកគេចពីម៉ូតូជ្រុលធ្លាក់ផ្លូវក្រឡាប់ចូលក្នុងប្រឡាយទឹក ធ្វើឱ្យតៃកុងរងរបួសធ្ងន់ត្រូវបានបញ្ជូនទៅមន្ទីរពេទ្យភ្លាមៗ។គ្រោះថ្នាក់ចរាចរនេះបានកើតឡើងនៅតាមមហាវិថីឈ្នះ-ឈ្នះ ក្នុងភូមិត្រពាំងពោធិ៍ សង្កាត់គោករកា ខណ្ឌព្រែកព្នៅ កាលពីល្ងាចថ្ងៃទី៩ ខែមីនា។
សមត្ថកិច្ចបានឱ្យដឹងថា រថយន្តក្នុងហេតុការណ៍នេះ ម៉ាកឡិចស៊ីស 400h ផ្លាកលេខកំពត 2A-0141 បិទឡូហ្គោសារព័ត៌មានCTC ។អ្នកបើកបរមិនទាន់ស្គាល់អត្តសញ្ញាណនៅឡើយ តែអាចជាអ្នកសារព័ត៌មាន។
ប្រភពដដែលបានបន្តថា មុនកើតហេតុ គេឃើញរថយន្តបើកពីជើងទៅត្បូង។លុះដល់កន្លែងខាងលើបានគេចពីម៉ូតូក៏រេចង្កូតធ្លាក់ផ្លូវក្រឡាប់ចូលក្នុងប្រឡាយទឹកស្អុយ បណ្តាលឱ្យអ្នកបើកបររងរបួសធ្ងន់។ភ្លាមៗនោះប្រជាពលរដ្ឋបាននាំគ្នាជួយយកជនរងគ្រោះចេញពីរថយន្តរួចបញ្ជូនទៅមន្ទីរពេទ្យ។
ក្រោយមកកម្លាំងនគរបាលជំនាញបានចុះមកពិនិត្យ ហើយឱ្យរថយន្តធំមកស្ទូចយករថយន្តក្រឡាប់នេះទៅទុកនៅប៉ុស្តិ៍រដ្ឋបាលជាបណ្តោះអាសន្ន៕ដោយ៖វិចិត្រ