ភំ្នពេញ៖អាវុធហត្ថភ្នំពេញនិងខណ្ឌពោធិ៍សែនជ័យ កាលពីថ្ងៃទី៣ ខែមីនា បានចាប់ជនសង្ស័យម្នាក់ពីបទក្លែងបន្លំធ្វើជាមន្ត្រីអាវុធហត្ថ ដើរប្រមូលលុយតាមកន្លែងម៉ាស្សាកោសជប់ និងប្រើអាវុធខុសច្បាប់។
មន្ត្រីចុះបង្ក្រាបបានឱ្យដឹងថា ការចាប់ខ្លួនបុរសបន្លំធ្វើមន្ត្រីអាវុធហត្ថនេះនៅម្តុំផ្ទះកោសជប់ម៉ាស្សា ផ្លូវ៣០ម៉ែត្រ ភូមិស្រែជម្រៅ សង្កាត់ចោមចៅ២ ខណ្ឌពោធិសែនជ័យ។ជនសង្ស័យ ឈ្មោះស៊ី កប អាយុ៣២ឆ្នាំ នៅសង្កាត់ចោមចៅ១ ខណ្ឌពោធិ៍សែនជ័យ។
បុគ្គលរូបនេះបានក្លែងឯកសណ្ឋានអាវុធហត្ថ ដាក់ឈ្មោះហេង សុភ័ក្រ្ត និងពាក់សក្តិ៣-កាន់កាប់អាវុធខ្លីម៉ាកK៥៤ លេខ១៩៥២បង់១-គ្រាប់៧គ្រាប់-អាយឌី១គ្រឿង-ម៉ូតូ១គ្រឿងម៉ាកវ៉េវផ្លាកលេខភ្នំពេញ1JV-2940។ជនសង្ស័យបានធ្វើសកម្មភាពដើរប្រមូលលុយតាមកន្លែងម៉ាស្សាកោសជប់ ក្នុងខណ្ឌដង្កោ ខណ្ឌពោធិ៍សែនជ័យ និងខណ្ឌមានជ័យ។
ជនសង្ស័យសារភាពថា ខ្លួនបានក្លែងបន្លំឯកសណ្ឋានអាវុធហត្ថដើរប្រមូលលុយតាមកន្លែងម៉ាស្សាកោសជប់ និងកាន់កាប់អាវុធខុសច្បាប់ពិតប្រាកដមែន។កម្លាំងជំនាញនៃអាវុធហត្ថភ្នំពេញ បានកសាងសុំណុំរឿងបញ្ជូនទៅតុលាការដើម្បីចាត់ការតាមច្បាប់៕ដោយ៖វិចិត្រ
