ភ្នំពេញ៖ ស្ត្រីម្នាក់បានចូលទៅកែសម្ផស្សក្នុង“មជ្ឈមណ្ឌលកែសម្ផស្សអន្តរជាតិM25” ទំនងខុសបច្ចេកទេស ធ្វើឱ្យស្ត្រីរូបនោះបានស្លាប់ភ្លាមៗ។ចំណែកម្ចាស់ទីតាំងក៏រត់គេចខ្លួនបាត់។
មន្ត្រីអាជ្ញាធរមូលដ្ឋានបានឱ្យដឹងថា កាលពីម៉ោងជិត១០យប់ ថ្ងៃទី៣ ខែមីនា មានការភ្ញាក់ផ្អើលដោយបែកធ្លាយថា មានស្ត្រីម្នាក់អាយុប្រមាណ៤០ឆ្នាំ បានដេកស្លាប់នៅបន្ទប់ជាន់ទី១នៃ“មជ្ឈមណ្ឌលកែសម្ផស្ស អន្តជាតិM25”។ទីតាំងនោះស្ថិតនៅតាមផ្លូវបេតុង ក្រុម២៤២ សង្កាត់ស្រះចក ខណ្ឌដូនពេញ។
ព័ត៌មានដែលកើតឡើងនោះបញ្ជាក់ថា ស្ត្រីរងគ្រោះបានមកមជ្ឈមណ្ឌលកែសម្ផស្សអន្តជាតិM25 នេះដើម្បីកែសម្ផស្សផ្នែកសុដន់។ក្នុងនោះសង្ស័យមកពីកែដើមទ្រូងទំនងខុសបច្ចេកទេសទើបបណ្តាលឱ្យស្ត្រីរងគ្រោះបានស្លាប់។បន្ទាប់មកម្ចាស់មជ្ឈមណ្ឌលមិននៅទទួលខុសត្រូវទេក៏រត់គេចខ្លួន។
ក្រោយកើតហេតុ សមត្ថកិច្ចនគរបាលជំនាញផ្នែកបច្ចេកទេសកោសល្យវិច័យរាជធានីភ្នំពេញបានចុះពិនិត្យនិងបន្តស្វែងរកការពិតនៃការស្លាប់របស់ស្ត្រីនេះ។ពាក់ព័ន្ធករណីខាងលើ ក្រុមការងារសារព័ត៌មាន Cambodia Flash News មិនអាចសុំការបំភ្លឺពីតំណាងមជ្ឈមណ្ឌលកែសម្ផស្សអន្តជាតិM25 បាននៅឡើយទេ។សារព័ត៌មានយើងរង់ចាំទទួលការបញ្ជាក់ច្បាស់លាស់ដើម្បីផ្សាយបន្តពេលក្រោយ៕ដោយ៖វិចិត្រ
