ពោធិ៍សាត់៖បុរសម្នាក់បានដើរក្នុងចម្ការដំឡូងជាន់មីនសល់ពីសម័យសង្គ្រាមបណ្តាលឱ្យផ្ទុះរងរបួសជើងធ្ងន់ធ្ងរត្រូវបានគេជួយដឹកទៅមន្ទីរពេទ្យភ្លាមៗដើម្បីសង្គ្រោះ។
ប្រភពពីមន្ត្រីអាជ្ញាធរមីនបានឱ្យដឹងថា ករណីពលរដ្ឋដើរជាន់មីនផ្ទុះនោះនៅចម្ការដំឡូង ខាងជើងភ្នំ១៥០០ ក្នុងភូមិដីក្រហម ឃុំអន្លង់រាប ស្រុកវាលវែង ខេត្តពោធិ៍សាត់ កាលពីព្រឹកថ្ងៃទី២៧ ខែកុម្ភ:នេះ។
មន្ត្រីរូបនោះបានបន្តថា បុរសរងគ្រោះឈ្មោះ គិន សាវី អាយុ៣៤ឆ្នាំ បានរងរបួសជើង។ បច្ចុប្បន្នកំពុងសម្រាកព្យាបាលនៅមណ្ឌលសុខភាព និងត្រៀមបញ្ជូនទៅមន្ទីរពេទ្យបង្អែកខេត្តពោធិ៍សាត់។
បន្ទាប់ពីមានគ្រោះថ្នាក់កើតឡើង មន្ត្រីអាជ្ញាធរមីនបានអំពាវនាវដល់ប្រជាពលរដ្ឋទាំងអស់សូមកុំចូលរុករានដីដែលមិនទាន់បានបោសសម្អាតមីន។ក្នុងនោះសូមកុំប៉ះពាល់នៅពេលឃើញគ្រាប់មិនទាន់ផ្ទុះ ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងក្រុមប្រតិបត្តិករបោសសម្អាតមីនដែលនៅទីជិតៗដើម្បីយកគ្រាប់ទាំងនោះទៅកម្ទេចចោល៕ដោយ៖វិចិត្រ