ភ្នំពេញ៖រថយន្តទំនើបម៉ាកFord បើកយ៉ាងលឿនទៅកៀរម៉ូតូដួលបណ្តាលឱ្យប្តីប្រពន្ធរងរបួសធ្ងន់ ហើយរថយន្តនោះបន្តទៅបុករបាំងថ្មចែកផ្លូវក្រឡាប់ផ្ងារកង់តែម្តង។គ្រោះថ្នាក់ចរាចរនេះបានកើតឡើងនៅម្តុំស្ថានទូតវៀតណាម ផ្លូវព្រះមុនីវង្ស ក្នុងសង្កាត់បឹងត្របែក ខណ្ឌចំការមន កាលពីរំលងអធ្រាត្រចូលថ្ងៃទី២៤ ខែកុម្ភៈ។
អ្នកឃើញហេតុការណ៍បានឱ្យដឹងថា ដំបូងមានបុរសម្នាក់ជិះម៉ូតូម៉ាកហុងដាឌ្រីម ឌុបប្រពន្ធតាមផ្លូវព្រះមុនីវង្សពីជើងទៅត្បូង។មកដល់កន្លែងខាងលើ ស្រាប់តែមានរថយន្តម៉ាកFord ផ្លាកលេខភ្នំពេញ2AR 6922 មកពីក្រោយក្នុងល្បឿនលឿនបានកៀរម៉ូតូដួលបណ្តាលឱ្យប្តីប្រពន្ធនោះរងរបួសធ្ងន់។ចំណែករថយន្តបង្កបន្តទៅបុករបាំងថ្មចែកផ្លូវខូចខាតច្រើនកង់ហើយក្រឡាប់ផ្ងារកង់។
បន្ទាប់មកសមត្ថកិច្ចចុះវាស់វែងយករថយន្តនិងម៉ូតូទៅទុកនៅនគរបាលចរាចរណ៍រាជធានីភ្នំពេញរង់ចាំតំណាងភាគីចូលខ្លួនដោះស្រាយ៕ដោយ៖វិចិត្រ
