រុស្ស៊ីប្តេជ្ញារុញច្រានកងកម្លាំងអ៊ុយក្រែនឲ្យទៅឆ្ងាយពីព្រំដែន ខណៈមានការព្រួយបារម្ភថាមីស៊ីលរយៈចម្ងាយឆ្ងាយផ្គត់ផ្គង់ដោយលោកខាងលិចអាចនឹងត្រូវបានប្រើធ្លាក់ចូលក្នុងដីរុស្ស៊ី។
រដ្ឋមន្ត្រីការបរទេសរុស្ស៊ី លោក Sergey Lavrov បាននិយាយថា វាចាំបាច់ណាស់ដែលត្រូវ “រុញ” កងទ័ពអ៊ុយក្រែនឲ្យចេញឆ្ងាយ ដើម្បីកុំឱ្យសព្វាវុធ ឬមីស៊ីលរយៈចម្ងាយឆ្ងាយដែលផ្តល់ដោយលោកខាងលិចទៅដល់ទឹកដីរុស្ស៊ី។ យោងតាមបទសម្ភាសន៍របស់ Lavrov ជាមួយប្រព័ន្ធផ្សព្វផ្សាយរុស្ស៊ី Lavrov បន្តថា៖ “ប្រសិនបើយើងអាចផ្លាស់ទីកាំភ្លើងធំរបស់កងកម្លាំងប្រដាប់អាវុធអ៊ុយក្រែនទៅឆ្ងាយបែបនេះ [វា]នឹងមិនបង្កការគំរាមកំហែងដល់ទឹកដីរបស់យើងឥឡូវនេះទេ។ យើងត្រូវជំរុញពួកគេឲ្យត្រឡប់ចេញពីទឹកដីដែលជាប្រទេសរបស់យើង”។
ក្នុងពេលជាមួយគ្នានេះលោក Lavrov ក៏បានរិះគន់ប្រធានាធិបតីអ៊ុយក្រែនលោក Volodymyr Zelenskyy ផងដែរថាជាមេដឹកនាំដែលគ្មានការឯករាជ្យ ហាក់ដូចជាត្រូវបានរៀបចំដោយលោកខាងលិច។ Lavrov បដិសេធយ៉ាងដាច់អហង្ការចំពោះការចោទប្រកាន់ពីអ៊ុយក្រែនថាខ្លួនមិនចង់ចរចាបញ្ចប់សង្រ្គាម។ ឃ្លាវាយប្រហារចុងក្រោយរបស់ Lavrov បាននិយាយទៅកាន់អង្គការណាតូថា “អស់សំណើចណាស់” ណាតូជាភាគីលូកដៃប្រឆាំងរុស្ស៊ី ជាអ្នកដែលតែងតែនិយាយថាមិនចង់ប្រយុទ្ធ ប៉ុន្តែបន្តសម្រុកជួយអាវុធដល់អ៊ុយក្រែន៕
ប្រភព៖Ukrainska pravda
ប្រភពរូប៖Ukrainska pravda
ប្រែសម្រួល៖សុខ តុលា
