ភ្នំពេញ៖ក្រុមប្រឹក្សាអភិវឌ្ឍន៍កម្ពុជា (CDC) នៅខែមករា បានអនុម័តគម្រោងវិនិយោគចំនួន១០ មានទុនវិនិយោគចំនួន៩៩,៤លានដុល្លារអាមេរិក បង្កើតការការជូនប្រជាពលរដ្ឋចំនួន១៧១២៩កន្លែង។
ចំនួននេះបើធៀបទៅនឹងខែមករាដូចគ្នាកាលពីឆ្នាំ២០២២កន្លងទៅ មានការថយចុះខណៈខែមករាឆ្នាំ២០២២ CDC អនុម័តគម្រោងវិនិយោគ រហូតដល់ទៅ ២៤ក្រុមហ៊ុនមានទុនវិនិយោគជាង ២២៧៧លានដុល្លារអាមេរិក និងផ្តល់ការងារចំនួន ១៩៩០៥កន្លែង។
យោងតាមរបាយការណ៍ប្រចាំថ្ងៃរបស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា គម្រោងវិនិយោគចំនួន១០នៅក្នុងខែមករាឆ្នាំ២០២៣នេះ រួមមាន៖ គម្រោងបង្កើតរោងចក្រកាត់ដេរសម្លៀកបំពាក់ កាបូប ស្បែកជើង គម្រោងបង្កើតរោងចក្រផលិតអំពូលភ្លើងចល័ត អំពូលភ្លើងសូឡា បរិក្ខារអគ្គិសនី នៅក្នុងរាជធានីភ្នំពេញ ខេត្តកំពង់ស្ពឺ ស្វាយរៀង ខេត្តកណ្តាល។
សូមបញ្ជាក់ថា ឆ្នាំ២០២២កន្លងទៅ CDCបានអនុម័តគម្រោងវិនិយោគចំនួន១៦២ មានទុនវិនិយោគជាង ៣៩២៧លានដុល្លារ ដោយបង្កើតឱកាសការងារជូនប្រជាពលរដ្ឋជាង ១៤១ ១៩៩កន្លែង៕ដោយៈសិរីមតី
