សមាជិកសភាអ៊ុយក្រែនបានអំពាវនាវសុំចំណាត់ការពីមហាអំណាចអាម៉េរិក ដាក់ទៅលើប្រទេសចិន និងឥណ្ឌា ជុំវិញការបន្តទិញប្រភពថាមពលពីជនឈ្លានពានរុស្ស៊ី។
ក្នុងដំណើរទស្សនកិច្ចទៅកាន់ក្រុងវ៉ាស៊ីនតោននៅដើមខែកុម្ភៈនេះ លោក Oleksandr Merezhko ដែលជាប្រធានគណៈកម្មាធិការកិច្ចការបរទេសក្នុងសភាអ៊ុយក្រែន បានអំពាវនាវឲ្យមានការដាក់ទណ្ឌកម្មដោយផ្ទាល់ទៅលើប្រទេសចិន និងឥណ្ឌា ធ្វើយ៉ាងណាដើម្បីរារាំងប្រទេសទាំងពីរនេះពីការជួយដល់សេដ្ឋកិច្ចដោយនាំចូលនូវប្រភពថាមពលពីរុស្ស៊ី។ សម្រង់សម្ដី Merezhko “ខ្ញុំបានព្យាយាមពន្យល់ថា នេះមិនទាន់គ្រប់គ្រាន់ទេ។ ចិនមិនខ្លាចអ៊ុយក្រែនទេ។ ចិនខ្លាចទណ្ឌកម្មរបស់អាម៉េរិក”។ លោកបានបន្តទៀតថា “សហរដ្ឋអាម៉េរិកអាច និងគួរតែរារាំងចិនពីការជួយរុស្ស៊ី ហើយដាក់ទណ្ឌកម្មបន្ថែមទៀតដើម្បីបញ្ឈប់ចិនពីការផ្តល់ហិរញ្ញប្បទានដល់សេដ្ឋកិច្ចរុស្ស៊ី និងក្បាលម៉ាស៊ីនយោធារុស្ស៊ី ដោយការទិញប្រេងនិងឧស្ម័នរបស់រុស្ស៊ី”។
យោងតាមភ្នាក់ងារ BLOOMBERG ការនាំចូលប្រេងពីរុស្ស៊ីក្នុងខែវិច្ឆិកា បានកើនឡើង ១៧ភាគរយស្មើនឹង ៧,៨១លានតោនធៀបនឹងឆ្នាំមុន ដែលជាចំនួនសរុបខ្ពស់បំផុតចាប់តាំងពីខែសីហា ដោយវ៉ាដាច់ដៃគូប្រកួតប្រជែងអារ៉ាប៊ីសាអូឌីត ក្លាយជាអ្នកផ្គត់ផ្គង់កំពូលរបស់ចិន៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
