ភ្នំពេញ៖ រាជរដ្ឋាភិបាលកម្ពុជា បានសម្រេចមិនយកពន្ធពីគ្រឹះស្ថានអប់រំឯកជនរយៈពេល៥ឆ្នាំបន្តទៀត ពោលគឺចាប់ពីឆ្នាំ២០២៤ ដល់ឆ្នាំ២០២៨។ ការសម្រេចរបស់សម្តេចតេជោនេះឆ្លើយតបនឹងសំណើរបស់សមាគមគ្រឹះស្ថានឧត្តមសិក្សាក្នុងជំនួបសម្តែងការគួរសម និងពិភាក្សាការងារនៅថ្ងៃទី០១កុម្ភៈ។
សម្តេច ហ៊ុន សែន បានចាត់ទុកគ្រឹះស្ថានអប់រំឯកជន គឺជាដៃគូដ៏សំខាន់របស់រាជរដ្ឋាភិបាលក្នុងការលើកកម្ពស់វិស័យអប់រំនៅកម្ពុជា។
លោក ហេង វ៉ាន់ដា ប្រធានក្រុមប្រឹក្សាភិបាលសមាគម បានឱ្យដឹងថាសម្តេច ហ៊ុន សែន បានសម្រេចអនុគ្រោះលើពន្ធគ្រឹះស្ថានអប់រំឯកជន រយៈពេល៥ឆ្នាំបន្តទៀត ពោលគឺចាប់ពីឆ្នាំ២០២៤ ដល់ឆ្នាំ២០២៨។ ប៉ុន្តែក្រៅពីនេះតម្រូវឱ្យបង់ពន្ធចំនួន៤មុខ រួមមាន៖ ពន្ធលើ ប្រាក់បៀវត្សរ៍, ពន្ធកាត់ទុកលើការជួលទីតាំង, ពន្ធអចលនទ្រព្យ និងពន្ធប៉ាតង់។
លោក ហេង វ៉ាន់ដា បានគូសបញ្ជាក់ថា ការអនុគ្រោះពន្ធនេះ គឺជាការរួមចំណែកដ៏សំខាន់ក្នុងការធ្វើឱ្យគ្រឹះស្ថានអប់រំឯកជន អាចពង្រឹងខ្លួនឯងឱ្យធ្វើសកម្មភាពបានរឹងមាំ និងធ្វើឱ្យគុណភាពអប់រំកាន់តែល្អប្រសើរ៕ដោយៈផាវី