ភ្នំពេញ៖ រាជរដ្ឋាភិបាលនឹងអន្តរាគមន៍ជួយដល់វិស័យសំណង់ ដើម្បីបញ្ចៀសហានិភ័យនៃវិស័យនេះកុំឱ្យធ្លាក់ចូលក្នុងភាពគ្រោះថ្នាក់ ឬដួលរលំ ខណៈវិស័យនេះបានចូលរួមចំណែក១០%នៃផលិតផលក្នុងស្រុកសរុប(GDP)កម្ពុជាប្រហែលនឹងវិស័យកាត់ដេរនិងទេសចរណ៍។ នេះបើយោងតាមលោក វង្សី វិស្សុត រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ។
ការចេញអន្តរាគមន៍ជួយដល់វិស័យសំណង់នេះ ដោយសារវិស័យសំណង់ជួបប្រទះបញ្ហានិងបញ្ហាកង្វះឥណទានសម្រាប់វិស័យនេះ ស្របពេលដែលអត្រាការប្រាក់កំពុងកើនឡើង។
លោកវង្សី វិស្សុត បានបញ្ជាក់បន្ថែមថា៖«បញ្ហាអចលនទ្រព្យ និងសំណង់អាចនឹងមានបញ្ហាកង្វះឥណទាន ជាជម្រើសយើងមិនអាចឱ្យវិស័យនេះដួលបានទេ ព្រោះជាចន្ទល់សេដ្ឋកិច្ចមួយធំណាស់ សំណង់មានចំណែកក្នុងGDP ១០%សព្វថ្ងៃ វិស័យកាត់ដេរចូលរួមចំណែក១០% ទេសចរណ៍ប្រហែល១០% ស្រូវ៧% វិស័យកម្មន្តសាលក៏ ១០%ដែរ»។
លោកបានគូសបញ្ជាក់បន្ថែមថា បច្ចុប្បន្ននេះ ក្រុមហ៊ុនសាងសង់ ឬក្រុមហ៊ុនអភិវឌ្ឍន៍អចលនទ្រព្យ ប្រមាណ ២០%ប៉ុណ្ណោះ ដែលមានធនធានអាចរស់នៅដោយខ្លួនឯងបាន ក្រៅពីនេះ គឺពឹងលើប្រព័ន្ធធនាគារ និងលំហូរទុនមកពីអ្នកទិញអចលនទ្រព្យ ដែលបញ្ហានេះទាមទារឱ្យមានការចូលរួមដោះស្រាយទាំងអស់គ្នា។
លោកមានប្រសាសន៍ថា ស្ថាប័នរដ្ឋចំនួនបីគឺនិយ័តករអចលនទ្រព្យ ធនាគារជាតិនៃកម្ពុជានិងអគ្គនាយកពន្ធដារ នឹងពិភាក្សាគ្នាជាមួយសមាគមអភិវឌ្ឍន៍លំនៅដ្ឋាន និងអភិវឌ្ឍន៍អចលនទ្រព្យ និងអ្នកអភិវឌ្ឍន៍រករូបមន្ត ដើម្បីដោះស្រាយបញ្ហានេះ៕ដោយៈសុភក្ត្រា