ភ្នំពេញ៖លោក ពុយ គា ប្រធានក្លិបអ្នកកាសែតកម្ពុជា ហៅកាត់ថា(កអក) បានបញ្ជាក់នៅក្នុងការបោះឆ្នោតជ្រើសរើសគណៈកម្មាធិការនាយករបស់ក្លិបអាណត្តិទី៧សម្រាប់ឆ្នាំ២០២៣-២០២៦នៅថ្ងៃទី២៧ មករា ២០២៣ នៅភោជនីយដ្ឋាន បឹងមាសថា៖ ខាងមុខនេះបញ្ហាជាអាទិភាពគឺយើងនឹងពង្រឹងក្រមសីលធម៌និងបណ្តុះបណ្តាលវិជ្ជាជីវៈបន្ថែមទៀតដល់អ្នកសារព័ត៌មាន។
លោកប្រធានក្លិបបានធ្វើការកត់សម្គាល់ថា៖ កន្លងមកជាពិសេសថ្មីៗនេះ«មានព្រឹត្តិការណ៍ព័ត៌មានមួយចំនួនបានធ្វើឲ្យកក្រើកពេញផ្ទៃប្រទេស។ ដូច្នេះវាចាំបាច់ទាមទារឲ្យមានការអប់រំនិងបណ្ដុះបណ្ដាលអំពីក្រមសីលធម៌ក៏ដូចជាការបណ្តុះបណ្តាលបន្ថែមនូវជំនាញវិជ្ជាជីវៈទៅដល់អ្នកសារព័ត៌មានទាំងអស់ដើម្បីចូលរួមលើកកម្ពស់វិស័យសារព័ត៌មាននៅកម្ពុជា។
លោក ពុយ គា ក៏បានបញ្ជាក់ដែរថា ក្រសួងប្រៃសណីយនិងទូរគមនាគមន៍នឹងជួយលើការបណ្ដុះបណ្ដាលខាងវិស័យឌីជីថល ហើយក៏នឹងមានការអញ្ជើញអ្នកជំនាញមកចែករំលែកទាក់ទងទៅនឹងផ្នែក Social Media ដូចជា tik tok ឬក៏ facebook ជាដើម។ ក្រៅពីនេះ នឹងមានការបណ្តុះបណ្តាលជាច្រើនទៀត។
លោកប្រធាន(កអក)ក៏បានរម្លឹកនិងថ្លែងអំណរគុណទៅដល់អតីតប្រធានក្លិបអ្នកកាសែតកម្ពុជានិងជានិពន្ធនាយកកាសែតរស្មីកម្ពុជាលោក ប៉ែន សមិទ្ធិ ដែលជាស្ថាបនិកដំបូងគេហើយបន្តមកទៀតគឺលោក ប៉ែន បូណា បានរួមចំណែកយ៉ាងច្រើនជួយដឹកនាំក្លិបនិងជួយទៅដល់អ្នកសារព័ត៌មាន។
ក្នុងនាមជាប្រធានក្លិបថ្មី លោកពុយ គា បានសន្យាថា នឹងបន្តធ្វើអ្វីៗគ្រប់យ៉ាងដែលជាប្រយោជន៍ដល់អ្នកសារព័ត៌មាននិងព្យាយាមចែករំលែកនូវចំណេះដឹង បទពិសោធ តាមដែលអាចធ្វើទៅបាន។
ឯកឧត្តម ខៀវ កាញ៉ារីទ្ធ រដ្ឋមន្ត្រីក្រសួងពត៌មាន បានថ្លែងក្នុងពិធីបោះឆ្នោតជ្រើសរើសគណៈកម្មាធិការនាយកអាណត្តិទី៧ របស់ក្លិបអ្នកកាសែតថា៖រយៈពេល៣០ឆ្នាំមកហើយ(កអក) គឺជាអង្គការមួយជាដៃគូដ៏ល្អបំផុតរបស់ក្រសួងព័ត៌មាន។ក្រសួងព័ត៌មានជានិច្ចកាលតែងតែរើសយក(កអក)ជាតំណាងសារព័ត៌មានកម្ពុជាទាំងមូល។(កអក)សម្បូរទៅដោយធនធានមនុស្សមានវិន័យ មានការអប់រំនិងការបណ្ដុះបណ្ដាលល្អ។
ឯកឧត្តមរដ្ឋមន្ត្រីបានបន្តថា៖ លោក ពុយ គា ដែលបានត្រូវជ្រើសរើសជាប្រធាន(កអក) ជំនួស លោក ប៉ែន បូណា ដែលទៅកាន់តំណែងជារដ្ឋលេខាធិការក្រសួងពត៌មាននោះជាអ្នកកាសែតជើងចាស់មានបទពិសោធទាំងថ្នាក់ជាតិនិងអន្តរជាតិ។
ឯកឧត្តមបានលើកឡើងថា៖ នៅពេលខាងមុខគឺនឹងមានការបើកវគ្គបង្រៀនបណ្ដុះបណ្ដាលអ្នកកាសែតអនឡាញដើម្បីឲ្យពួកគាត់បានយល់ពីក្រមសីលធម៌និងវិជ្ជាជីវៈសារពត៌មានហើយនឹងអញ្ជើញខាងនគរបាលនិងខាងក្រសួងយុត្តិធម៌មកនិយាយអំពីច្បាប់មួយចំនួនដើម្បីឲ្យអ្នកកាសែតសួរដេញដោល។
គួរបញ្ជាក់ដែរថា៖ សរុបលទ្ធផលនៃការបោះឆ្នោតដែលមានសមាជិកអ្នកសារព័ត៌មានមកពីស្ថាប័ននានាបានចូលរួមបោះឆ្នោតសរុបចំនួន ២៨១ នាក់។ ក្នុងនោះបានបោះឆ្នោតយល់ព្រមជ្រើសរើសគណៈកម្មាធិការនាយកសម្រាប់អណ្ដិតទី៧ ចំនួនជិត ២៧៧ នាក់ និងសន្លឹកឆ្នោតមិនបានការ២ សន្លឹក និងអនុប្បវាទចំនួន ២ សន្លឹក។
សមាជិកគណៈកម្មាធិការនាកយកក្លិបអ្នកកាសែតកម្ពុជាដែលជាប់ឆ្នោត សម្រាប់អណត្តិទី៧ មានចំនួន ៩រូប។ ក្នុងនោះរួមមាន ១. លោក ខៀវ កូឡា ស្ថាបនិកក្លិបអ្នកកាសែតកម្ពុជា ២. លោក ជេត សន ស្ថាបនិកក្លិបអ្នកកាសែតកម្ពុជា ៣. លោកស្រី ថុង សុវណ្ណរង្សី អគ្គនាយិកាសារព័ត៌មានកោះសន្តិភាព ៤. លោក ទាវ សារៈមុនី និពន្ធនាយកសារព័ត៌មានរស្មីកម្ពុជា ៥. លោក នៅ សុភ័ស្ស នាយកសារព័ត៌មាន CLICK NEWS នៃCBS ៦. លោក ពុយ គា ប្រធានអ្នកឆ្លើយឆ្លងឱ្យទីភ្នាក់ងារព័ត៌មានក្យូដូ ៧. កញ្ញា យ៉ាន់ លីណា នាយិកាវិទ្យុវាយោ FM ៨.លោក លាង ដឺលុច សហស្ថាបនិកសារព័ត៌មានថ្មីៗ និង៩. លោក សៅ ភិរុណ អគ្គនាយករង ស្ថានីយវិទ្យុ និងទូរទ្សន៍ BTV៕ដោយៈសិរីមតី