ភ្នំពេញ៖ការរៀបចំព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះ គ្រោងនឹងចំណាយថវិកាមិនតិចជាង ២០០លានដុល្លារអាមេរិកនោះទេ។នេះបើតាមប្រសាសន៍របស់ លោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ ក្រសួងសេដ្ឋកិច្ច និងហិរញ្ញវត្ថុ ។
ក្នុងវេទិកាសាធារណៈ ស្តីពីការគ្រប់គ្រងម៉ាក្រូសេដ្ឋកិច្ច និងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២៣ នៅថ្ងៃទី២៥ ខែមករា ឆ្នាំ២០២៣ លោក វង្សី វិស្សុត បានបញ្ជាក់ថា ទឹកប្រាក់ប្រមាណ ២០០លានដុល្លារនេះ មិនរាប់បញ្ចូលលើការសាងសង់ពហុកីឡដ្ឋានមករតតេជោ ដែលជាជំនួយទាំងស្រុង ១០០% របស់មិត្តចិននោះទេ ហើយផ្ទះកីឡាសម្រាប់កីឡាករស្នាក់នៅ ក៏មិនរាប់បញ្ចូលដែរ។ ផ្ទះកីឡារជាការប្រើប្រាស់ យន្តការភាពជាដៃគូរវាងរដ្ឋ និងឯកជនរាជរដ្ឋាភិបាល មិនចំណាយថវិកានោះទេ។
សូមជម្រាបថា នៅសល់តែ ៩៩ថ្ងៃទៀតប៉ុណ្ណោះ នឹងដល់ពេលវេលា ដែលកម្ពុជា ទទួលភារកិច្ចរៀបចំការប្រកួតកីឡា អាស៊ីអាគ្នេយ៍ ឬស៊ីហ្គេមហើយ។ នេះជាព្រឹត្តិការណ៍ជាប្រវត្តិសាស្ត្រថ្មីមួយទៀត សម្រាប់កម្ពុជាបន្ទាប់ពីរង់ចាំអស់រយៈពេលប្រមាណ ៦៤ឆ្នាំមកហើយ។ការប្រកួតកីឡាស៊ីហ្គេមលើកទី៣២ នៅកម្ពុជា នឹងប្រព្រឹត្ដទៅ ចាប់ពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣។ រីឯការប្រកួតកីឡាអាស៊ានប៉ារ៉ាហ្គេម លើកទី១២ នៅកម្ពុជា ចាប់ផ្ដើមការប្រកួតពីថ្ងៃទី៣-០៩ ខែមិថុនា ឆ្នាំ២០២៣៕ដោយៈសិរីមតី
