ត្បូងឃ្មុំ៖បុរសម្នាក់បានចាក់សម្លាប់ប្រពន្ធរួចប្រគល់ខ្លួនឱ្យសមត្ថកិច្ច ត្រូវផ្នែកជំនាញបានកសាង សំណុំរឿងត្រៀមបញ្ជូនទៅតុលាការដើម្បីអនុវត្តតាមច្បាប់។
មន្ត្រីមូលដ្ឋានបានឱ្យដឹងថា បុរសជាប្ដីម្នាក់បានប្រើខ្សែរឹតកនិងបានយកពន្លាកចៀរជ័រកៅស៊ូមកចាក់ប្រពន្ធបណ្ដាលឱ្យស្លាប់ភ្លាមៗនៅក្នុងថ្លុកឈាម។អំពើឃាតកម្មនេះបានកើតឡើងនៅចម្ការកៅស៊ូក្នុងភូមិបុស្សចេក ស្រុកពញាក្រែក ខេត្តត្បូងឃ្មុំ កាលពីល្ងាចថ្ងៃទី២៤ ខែមករា។
ក្រោយហេតុការណ៍ដ៏រន្ធត់នេះបានកើតឡើង បុរសជាប្ដីបានជិះម៉ូតូចេញទៅប្រគល់ខ្លួននៅប៉ុស្តិ៍ នគរបាលដោយមិនបានរត់គេចខ្លួនឡើយ។ជនសង្ស័យឈ្មោះជឹម ឆាន អាយុ៣១ឆ្នាំ នៅភូមិបុស្សចេក ឃុំត្រពាំងផ្លុង ស្រុកពញាក្រែក។ចំណែកប្រពន្ធដែលស្លាប់ឈ្មោះកាក់ ស៊ាង ហៅបឿក អាយុ៣៦ឆ្នាំ។
មន្ត្រីដដែលបានបន្តថា មុនកើតហេតុ ប្ដីប្រពន្ធនេះតែងតែមានជម្លោះជាញឹកញយ ហើយក៏បានលែងលះគ្នាដោយបន្សល់ទុកកូន២នាក់ឱ្យរស់នៅជាមួយតា,យាយជាអ្នកមើលថែទាំ។ក្រោយមកបុរសជាប្ដីបានមកសុំជានាជាមួយប្រពន្ធរស់នៅជាមួយគ្នាវិញ។
នៅថ្ងៃកើតហេតុ បុរសជាប្ដីបានផឹកស្រាជាមួយអ្នកភូមិស្រវឹងខ្លាំងក៏បានបោះពាក្យសម្ដីប្រាប់គេឯងថា“ថ្ងៃនេះបើមិនស្លាប់ខ្ញុំក៏ស្លាប់ប្រពន្ធដែរ”។ជនសង្ស័យបានជិះម៉ូតូដល់ផ្ទះបានបង្កជម្លោះហើយបានយកខ្សែរឹតចងកនិងយកពន្លាកចៀរជ័រចាក់បំពង់កប្រពន្ធបន្ថែមទៀតបណ្តាលឱ្យស្លាប់តែម្តង៕ដោយ៖វិចិត្រ