ភ្នំពេញ៖ប្តីនិងប្រពន្ធបានជិះម៉ូតូរៀងខ្លួនចេញពីផ្សារដើមគបំណងទៅផ្ទះ ស្រាប់តែមានចោរមួយក្រុមជិះម៉ូតូ៣គ្រឿងមកឆក់យកកាបូបលុយបានសម្រេចរួចគេចខ្លួនបាត់អស់។ករណីបង្កការភ្ញាក់ផ្អើលនេះបានកើតឡើងនៅមុខវត្តស្ទឹងមានជ័យ តាមផ្លូវព្រះមុនីរ៉េត ក្នុងសង្កាត់ស្ទឹងមានជ័យទី១ ខណ្ឌមានជ័យ កាលពីរំលងអធ្រាត្រឈានចូលថ្ងៃទី២៥ ខែមករា។
ស្ត្រីរងគ្រោះបានឱ្យដឹងថា មុនកើតហេតុ ពួកគាត់បានជិះម៉ូតូម្នាក់១គ្រឿងចេញពីផ្សារដើមគដោយប្តីជិះតាមក្រោយ ហើយស្ពាយកាបូបលុយពីចំហៀង។មកដល់កន្លែងខាងលើ ស្រាប់តែមានក្រុមចោរជិះម៉ូតូ៣គ្រឿងមកពីក្រោយឆក់យកកាបូបលុយពីប្តីរបស់គាត់បានសម្រេចរួចជិះម៉ូតូគេចខ្លួនបាត់អស់។
ក្នុងកាបូបនោះមានលុយចំនួនជាង១០លានរៀលនិងទូរសព្ទម៉ាក Iphone 13 មួយគ្រឿង មានទាំងឯកសារមួយចំនួនទៀត។ក្រោយកើតហេតុ ជនរងគ្រោះបានទៅដាក់ពាក្យបណ្តឹងនៅនគរបាលប៉ុស្តិ៍រដ្ឋបាលស្ទឹងមានជ័យទី១ ដើម្បីសុំឱ្យជួយស្វែងរកចាប់ក្រុមជនសង្ស័យទាំងនោះយកមកចាត់ការតាមច្បាប់៕ដោយ៖វិចិត្រ