ស្ទឹងត្រែង៖ពីមុនគឺជាផ្លូវរទេះគោ ផ្លូវដីស ក្រួសក្រហម មកដល់បច្ចុប្បន្នប្រែក្លាយជាផ្លូវចាក់កៅស៊ូដែលតភ្ជាប់ស្ពាន ផ្លូវនិងលូពី ក្រុងស្ទឹងត្រែងឆ្ពោះទៅកាន់ទីរួមស្រុកសេសាននិងមានផ្លូវលំនៅតាមបណ្ដាឃុំជាច្រើនខ្សែទៀតកាន់តែកៀករវាងទីប្រជុំជននិងតំបន់ដាច់ស្រយាល។ជាពិសេសនោះបានជួយសម្រួលដល់ប្រជាពលរដ្ឋក្នុងការធ្វើដំណើរដឹកកសិផលផ្សេងៗពីតំបន់ជនបទមកទីរួមខេត្ត។
លោក សរ គឹមណាត ប្រធានមន្ទីរសាធារណការនិងដឹកជញ្ជូនខេត្តស្ទឹងត្រែង បាននិយាយរៀបរាប់ពីសមិទ្ធផលតភ្ជាប់ផ្លូវទៅកាន់ស្រុកសេសាននិងផ្លូវជាច្រើនខ្សែទៀតក្នុងខេត្តស្ទឹងត្រែងឆ្នាំ២០២២និងគម្រោងឆ្នាំ២០២៣ដែលគ្រោងនឹងស្ថាបនាជាបន្តទៀត។
ការតភ្ជាប់ផ្លូវស្ពានលូដែលជាសរសៃឈាមសេដ្ឋកិច្ចក្នុងតំបន់នៅក្នុងស្រុកសេសានធ្វើឲ្យប្រជាពលរដ្ឋរស់នៅឃុំឆ្ងាយៗពិទីរួមខេត្តមានជីវភាពប្រសើរមានការដាំដុះបន្លែគ្រប់ប្រភេទយកមកលក់នៅទីផ្សារ។លើសពីនេះនៅតាមដងទន្លេសេសានមានការរៀបចំឲ្យក្លាយជារមណីយដ្ឋានទេសចរណ៍។ជាមួយនោះវិស័យឯកជនក៏បានផុសឡើងមានការរៀបចំឲ្យក្លាយជាតំបន់ទេសចរផងដែរ៕ ដោយៈសុខុម