វិមានក្រឹមឡាំងចេញមុខជាថ្មីជំរុញឲ្យអ៊ុយក្រែនឆាប់ទទួលយកការទាមទាររបស់រុស្ស៊ី ដើម្បីអាចបានបញ្ចប់សង្រ្គាម, បញ្ចប់ការកាប់សម្លាប់។
នេះដោយយោងតាមសារថ្មីរបស់អ្នកនាំពាក្យវិមានក្រឹមឡាំង លោក Dmitry Peskov នៅចុងសប្តាហ៍នេះ។ Peskov បានពាំនាំពាក្យសម្ដីមកថា អ៊ុយក្រែនគួរតែឆាប់យល់ព្រមទទួលយកនូវការទាមទាររបស់ទីក្រុងមូស្គូដែលបានដាក់ចេញជាយូរមកហើយនោះ ដើម្បីការបញ្ចប់សង្រ្គាមអាចធ្វើឡើងទៅដោយឆាប់រហ័ស។ ការទាមទារនោះ គឺបានដាក់ទៅលើទឹកដីអ៊ុយក្រែននៅភាគខាងកើត និងខាងត្បូង ដោយគ្រាន់តែផ្តល់វាមកឲ្យជាកម្មសិទ្ធិរបស់រុស្ស៊ី។
អ្នកនាំពាក្យរូបនេះបានបន្តទៀតថា បើមិនដូច្នេះទេ ប្រទេសរុស្ស៊ីនឹងសម្រេចបាននូវគោលដៅរបស់ខ្លួនតាមរយៈមធ្យោបាយផ្សេងទៀត ព្រោះរុស្ស៊ីមានវិធីច្រើនលើសពីមួយ។ និយាយជាចុងក្រោយទៅកាន់សារព័ត៌មាន បើអ៊ុយក្រែនទទួលយក នោះសង្រ្គាមនឹងបញ្ចប់ភ្លាមៗ។
មិនទាន់មានការឆ្លើយតបថ្មីពីអ៊ុយក្រែនទេ តែអ៊ុយក្រែនបានសន្យាហើយថា នឹងប្រយុទ្ធរហូតដល់រុស្ស៊ីដកទ័ពទាំងអស់ចេញពីប្រទេសរបស់ខ្លួន ស៊ូមិនឲ្យបាត់បង់ទឹកដីមួយដុំណាឡើយ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
