ភ្នំពេញ៖ មន្ទីរពេទ្យជាតិ «តេជោសន្តិភាព» ដែលជាមន្ទីរពេទ្យផ្តួចផ្តើមបង្កើតឡើងក្រោមគំនិតផ្ទាល់របស់សម្តេចតេជោ ហ៊ុន សែន ដើម្បីត្រៀមឆ្លើយតប នឹងជំងឺរាតត្បាតផ្សេងៗ មានសមត្ថភាពទទួលអ្នកជំងឺជិត១ម៉ឺននាក់។
មន្ទីរពេទ្យជាតិ «តេជោសន្តិភាព» បានចាប់ផ្តើមដំណើរការសាងសង់កាលពីថ្ងៃទី២៨ ខែមីនា ឆ្នាំ២០២២លើផ្ទៃដីប្រមាណ៧.៥៨ហិកតា ហើយគ្រោងបញ្ចប់ការសាងសង់ និងបំពាក់បរិក្ខារនៅចុងខែមិថុនា ឆ្នាំ២០២៣។ មន្ទីរពេទ្យជាតិនេះស្ថាបនាដោយក្រុមហ៊ុន ស៊ីជេអ៊ីស៊ី CJEC.co,Ltd សហការជាមួយសាលារាជធានីភ្នំពេញ។
មន្ទីរពេទ្យជាតិនេះនឹងដើរតួនាទីគាំពារយ៉ាងសំខាន់ លើសុខមាលភាពប្រជាពលរដ្ឋ មានអគារសរុបចំនួន១១អគារ រួមមាន៖ អគាររដ្ឋបាល អគារអន្តេវាសិកដ្ឋាន អគារព្យាបាល និងសង្គ្រោះបន្ទាន់ អគារសម្រាកព្យាបាលជំងឺធ្ងន់មានមួយអគារអគារសម្រាកព្យាបាលជំងឺស្រាលមាន ៥អគារ អគារបច្ចេកទេស និងអគារបច្ចេកទេស ។ បន្ថែមពីលើនោះក៏មានចំណតយានយន្តអាចផ្ទុករថយន្ត ២៨៥គ្រឿង និងម៉ូតូ ៥៤០គ្រឿង មានសួនច្បារបៃតងជិត ៦ពាន់ម៉ែត្រក្រឡា។
មន្ទីរពេទ្យជាតិនេះ មានគ្រែសរុបទាំងអស់ចំនួន ៩,៤៩៦គ្រែ។ ក្នុងនោះ គ្រែសម្រាកព្យាបាលសម្រាប់អ្នកជំងឺមានចំនួនសរុប ៩,២៤៤គ្រែ គ្រែសម្រាប់គ្រូពេទ្យប្រចាំការចំនួន ៤៦គ្រែ និងគ្រែសម្រាប់បុគ្គលិកស្នាក់នៅចំនួន ២០៦គ្រែ៕ដោយៈផាវី
