ភ្នំពេញ៖ ក្រុមអាជីវករលក់មាស និងអ្នកជំនាញទីផ្សារមាសនៅកម្ពុជាកត់សម្គាល់ឃើញថា ចូលដល់ខែមករាដើមឆ្នាំ ឆ្នាំ២០២៣ តម្លៃមាសនៅកម្ពុជាក៏ដូចជានៅទីផ្សារពិភពលោក បានហក់ឡើងខ្ពស់គួរឲ្យកត់សម្គាល់។ ជាក់ស្ដែង ហាងឆេងមាសដែលបានលក់នៅថ្ងៃទី១៨ខែមករានៅហាងមួយចំនួនក្នុងរាជធានីភ្នំពេញមានតម្លៃដល់ទៅ២២៨០ដុល្លារក្នុងមួយតម្លឹង ដែលតម្លៃនេះ គឺមានការកើនឡើងប្រមាណជិត១០០ បើធៀបនឹងតម្លៃមាសកាលពីខែធ្នូឆ្នាំ២០២២។
ការកើនឡើងនេះត្រូវបានក្រុមអាជីវករ និងអ្នកជំនាញវាយតម្លៃថាអាចបណ្តាលមកពីតម្រូវការមាសនៅតាប្រទេសធំការកើនឡើងគួបផ្សំសហរដ្ឋអាមេរិកបន្ធូរបន្ថយការដំឡើងអត្រាការប្រាក់គោលលុយដុល្លារនិងការវាយតម្លៃសេដ្ឋកិច្ចសកមានស្ថានភាពមិនសូវល្អនៅឆ្នាំនេះ គួបផ្សំនឹងតម្រូវការមាសកំពុងកើនឡើងនៅក្នុងប្រទេសចិន នៅអំឡុងថ្ងៃបុណ្យចូលឆ្នាំចិន។
តាមរយៈកត្តាទាំងនេះធ្វើឲ្យអ្នកជំនាញជឿជាក់ថា តម្លៃមាសនៅលើទីផ្សារកម្ពុជានិងលើពិភពលោកនឹងអាចបន្តកើឡើងបន្ថែមទៀត។ ប៉ុន្ដែ ក៏អាចថមថយមកវិញដែរ នៅក្រោយបុណ្យចូលឆ្នាំចិន៕ដោយៈសិរីមតី