ដោយឡែកមេដឹកនាំអ៊ុយក្រែនលោកហ្សេឡិនស្គី បានជូនដំណឹងមកថា ស្ថានភាពនៅខ្សែបន្ទាត់ជួរមុខតំបន់ដុនបាស នៅតែកំពុងពិបាកខ្លាំង ខណៈរុស្ស៊ីសម្រុកបាញ់ផ្លោង និងវាយរុលឥតឈប់។
នេះដោយយោងតាមសុន្ទរកថាតាមវីដេអូកាលពីយប់ថ្ងៃទី ១៨ ខែមករា ឆ្នាំ២០២៣។ លោកស្គីថា “ថ្ងៃនេះ ដូចសព្វមួយដង យើងបានទាក់ទងជាមួយយោធារបស់យើងពេញមួយថ្ងៃ។ ស្ថានភាពនៅជួរមុខនៅតែលំបាក Donbas គឺជាចំណុចកណ្តាលនៃការប្រយុទ្ធដ៏ឃោរឃៅ និងជាមូលដ្ឋានឈរជើងដ៏សំខាន់បំផុត។ យើងកំពុងកត់សម្គាល់ការកើនឡើងបន្តិចម្តងៗនៃចំនួនករណីបាញ់ផ្លោង និងការប៉ុនប៉ងធ្វើសកម្មភាពវាយលុកពីសំណាក់អ្នកកាន់កាប់រុស៊្សី”។
មេដឹកនាំរូបនេះបានសម្ដែងការដឹងគុណដល់កងកម្លាំងយុទ្ធជនរបស់អ៊ុយក្រែនទាំងអស់ ដែលបានកាន់តំណែងរបស់ពួកគេបានរឹងមាំ! លោកថា “សូមអរគុណដល់អ្នកប្រយុទ្ធនៃកងពលតូច Huntsman កងពលតូចទី ៦៨ និងកងពលតូចម៉ារីនទី ៣៦ សម្រាប់ការវាយលុកសត្រូវយ៉ាងមានប្រសិទ្ធភាពនិងសម្រាប់ការតស៊ូដែលយើងត្រូវការនៅក្នុងតំបន់ Donbas! ខ្ញុំក៏សូមអរគុណដល់អង្គភាពស៊ើបការណ៍សម្ងាត់នៃក្រសួងការពារជាតិចំពោះអ្វីៗទាំងអស់ដែលពួកគេធ្វើដើម្បីកាត់បន្ថយឱកាសរបស់អ្នកកាន់កាប់ផងដែរ”។
ព័ត៌មានបន្ថែម លោកស្គីមិនបានជម្រាបពីវឌ្ឍនភាពណាមួយដែលកងកម្លាំងអ៊ុយក្រែនចាប់យកបាននារយៈពេលចុងក្រោយនេះទេ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
