ចំពេលដែលការផ្តល់រថក្រោះខ្លារខិនទៅអ៊ុយក្រែនកំពុងស្ថិតក្នុងដំណើររាំងស្ទះ អនុអធិការបតីអាល្លឺម៉ង់ស្រាប់តែបាននិយាយថា អាល្លឺម៉ង់មិនគួររារាំងជំនួយបែបនេះទេ។
អនុអធិការបតីអាល្លឺម៉ង់ លោក Robert Habeck បានឆ្លើយតបទៅកាន់សារព័ត៌មានកាលពីថ្ងៃទី ១២ ខែមករា យ៉ាងដូច្នេះ ដោយបានកត់សម្គាល់ថា អាល្លឺម៉ង់គឺជារដ្ឋឯករាជ្យ និងត្រូវតែហ៊ានសម្រេចចិត្តលើអ្វីដែលជាខ្លួនឯង។ លោកបាននិយាយក្នុងសេចក្តីថ្លែងការណ៍ទៅកាន់អ្នកយកព័ត៌មានអំពីគំនិតផ្តួចផ្តើមនេះថា៖ “ប្រទេសអាល្លឺម៉ង់មិនគួរឈរនៅក្នុងផ្លូវរារាំង នៅពេលដែលប្រទេសផ្សេងទៀតបានផ្តល់ការសម្រេចចិត្តគាំទ្រអ៊ុយក្រែនដោយឯករាជ្យនោះទេ”។
ការផ្តល់រថក្រោះខ្លារខិន ឬ Leopard កំពុងក្លាយជាប្រធានបទក្តៅសម្រាប់ម្ចាស់ផលិតកម្មអាល្លឺម៉ង់នៅប៉ុន្មានសប្តាហ៍នេះ ខណៈដែលមន្រ្តីទីក្រុងប៊ែរឡាំងក៏កំពុងស្ថិតក្រោមសម្ពាធផងដែរ។
ការអំពាវនាវបើកភ្លើងខៀវពីសំណាក់អនុអធិការបតីអាល្លឺម៉ង់រូបនេះ បានធ្វើឡើងក្រោយគ្នាបន្ទាប់ពីប្រធានាធិបតីប៉ូឡូញ ឌូដា បានបង្ហាញឆន្ទៈយល់ព្រម១០០ភាគរយលើការផ្តល់រថក្រោះ Leopard ទៅកាន់អ៊ុយក្រែន៕
ប្រភព៖ ALJAZEERA
ប្រភពរូប៖AFP
ប្រែសម្រួល៖សុខ តុលា
