មេដឹកនាំអ៊ុយក្រែន លោកVolodymr Zelenskiy បានចេញមុខច្រានចោលការអះអាងកាន់កាប់របស់ទាហានស៊ីឈ្នួលរុស្ស៊ីលើទីក្រុងរ៉ែអំបិលSoledarថាជារឿងមិនពិត ខណៈស្ថានភាពចុងក្រោយការប្រយុទ្ធគ្នានៅតែកំពុងបន្ត។
ប្រធានាធិបតីអ៊ុយក្រែន លោក Zelenskyy បាននិយាយក្នុងសេចក្តីថ្លែងការណ៍ប្រចាំថ្ងៃរបស់លោកយប់ថ្ងៃទី ១១ ខែមករា ឆ្នាំ២០២៣ថា ការអះអាងរបស់ទាហានស៊ីឈ្នួលរុស្ស៊ី គឺគ្រាន់តែជាការធ្វើពុត បោកប្រាស់ប៉ុណ្ណោះ។ ការប្រយុទ្ធគ្នានៅតែកំពុងបន្តនៅឡើយក្នុងទីក្រុង Soledar ដែលជាទីក្រុងល្បីខាងធនធានរ៉ែអំបិលស្ថិតនៅភាគខាងកើតប្រទេសអ៊ុយក្រែន។ លោកស្គីបន្តថា “រដ្ឋភេរវករ និងអ្នកឃោសនារបស់ខ្លួនកំពុងព្យាយាមធ្វើពុត” ដើម្បីសម្រេចបានជោគជ័យមួយចំនួននៅក្នុងខ្សែបន្ទាត់ Soledar, “ប៉ុន្តែការពិតការប្រយុទ្ធនៅតែកំពុងបន្ត” ។ លោកបាននិយាយទៀតថា រណសិរ្សរំដោះអ៊ុយក្រែន Donetsk កំពុងតែមមាញឹកដកដៃមិនរួចនៅទីនោះ “ហើយពួកគេកំពុងធ្វើអ្វីគ្រប់យ៉ាងដើម្បីពង្រឹងការការពារអ៊ុយក្រែនដោយគ្មានការសម្រាកសូម្បីតែមួយថ្ងៃ”។
ជុំវិញស្ថានភាពសមរភូមិជាក់លាក់ មិនទាន់មានសារព័ត៌មានអន្តរជាតិណាមួយអាចធ្វើការផ្ទៀងផ្ទាត់ចុះទៅដកស្រង់ផ្ទាល់នៅទីក្រុងSoledar ចំណុចភូមិសាស្រ្តបង្ហូរឈាមបាននោះទេ។ បើតាមការបញ្ជាក់ដោយក្រុមទាហានស៊ីឈ្នួលរុស្ស៊ី Soledar គឺត្រូវបានធ្លាក់ក្នុងការកាន់កាប់រុស្ស៊ីទាំងស្រុងហើយ ព្រមទាំងសម្លាប់បានទាហានអ៊ុយក្រែនប្រហែលជា៥០០នាក់ទៀតផង៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា