បាត់ដំបង៖បុរសម្នាក់បានចុះចាប់ត្រីក្នុងអាងទឹកប៉ះចំខ្សែភ្លើងរលាត់សម្បកឆក់ស្លាប់មួយរំពេច នៅភូមិតាហ៊ី ស្រុកបវេល ខេត្តបាត់ដំបង កាលពីរំលងអធ្រាត្រឈានចូលថ្ងៃទី១១ ខែមករា។
ឈ្មោះសាន ជូ អាយុ១៨ឆ្នាំ ត្រូវជាមិត្តភក្តិជនរងគ្រោះបានបំភ្លឺថា មុនកើតហេតុ ឈ្មោះតា សំ -ឈ្មោះ រីឆាតនិងឈ្មោះពុំ សំណាង បានចុះចាប់ត្រីក្នុងអាងក្រោយរោងម៉ាស៊ីនមួយកន្លែង។មួយសន្ទុះក្រោយមកស្រាប់តែឈ្មោះពុំ សំណាង ត្រូវខ្សែភ្លើងឆក់ដួលទៅក្នុងទឹក ហើយគ្នីគ្នាក៏ស្ទុះទៅចាប់ទាញជនរងគ្រោះ រួចនាំយកទៅមណ្ឌលសុខភាពព្រៃខ្ពស់។ប៉ុន្តែត្រូវបានគ្រូពេទ្យប្រាប់ថាបុរសរូបនោះដាច់ខ្យល់ស្លាប់បាត់ទៅហើយ។
តាមការពិនិត្យរបស់មន្ត្រីជំនាញនិងគ្រូពេទ្យបានបញ្ជាក់ថា សពជនរងគ្រោះស្លាប់ដោយសារចរន្តភ្លើងឆក់ពិតប្រាកដមែន ហើយបានប្រគល់សពឱ្យក្រុមគ្រួសារយកទៅធ្វើបុណ្យ៕ដោយ៖វិចិត្រ