ភ្នំពេញ៖ ពេលម្ចាស់ចតម៉ូតូចូលដកលុយផ្ទះវីង ស្រាប់តែមានជនសង្ស័យឡើងជិះម៉ូតូបើក ប៉ងរត់គេចខ្លួន តែត្រូវបានម្ចាស់ឃើញទាន់ស្រែកឆោឡោផ្អើលពលរដ្ឋជួយដេញចាប់បាន។ហេតុការណ៍នេះបានកើតឡើងនៅភូមិព្រៃទា២ សង្កាត់ចោមចៅទី៣ ខណ្ឌពោធិ៍សែនជ័យ កាលពីល្ងាចថ្ងៃទី៩ ខែមករា។
សមត្ថកិច្ចបានឱ្យដឹងថា បុរសដែលចាប់ខ្លួនឈ្មោះ ភោគ កុសល អាយុ៣៣ឆ្នាំ ទីកំណើតភូមិខ្នាចជើង ស្រុកសំរោង ខេត្តតាកែវ មកស្នាក់នៅភូមិ សង្កាត់ខាងលើ។
ជននេះបានសារភាពប្រាប់នគរបាលថា មកពីខ្លួនគ្មានលុយចាយ ដោយកន្លងមកខ្លួនក៏ធ្លាប់ត្រូវចោរលួចម៉ូតូអស់១គ្រឿង ទើបពេលនេះខ្លួនលួចយកម៉ូតូអ្នកផ្សេងជាការជំនួសវិញ។ម៉ូតូដែលចោរលួចម៉ាកហុងដាឌ្រីម ផ្លាកលេខភ្នំពេញ1BU-8591 ជាកម្មសិទ្ធិរបស់ឈ្មោះ ជា វីរ៉ា អាយុ២៣ឆ្នាំ ជាកម្មករសំណង់ កន្លែងកំណើត ភូមិបឹងម្នង ស្រុករមាសហែក ខេត្តស្វាយរៀង។
មុនកើតហេតុ បុរសខាងលើជិះម៉ូតូទៅដកលុយនៅផ្ទះវីងបានទុកម៉ូតូនៅក្បែរផ្ទះវីងនោះ។ពេលរវល់ដកលុយស្រាប់តែជនសង្ស័យលួចយកម៉ូតូជិះរត់គេចខ្លួនក៏បានស្រែកឆោឡោភ្ញាក់ផ្អើលពលរដ្ឋជួយដេញ ចាប់បានយកប្រគល់ឱ្យសមត្ថកិច្ចតែម្តង៕ដោយ៖វិចិត្រ