ប្រែសម្រួល៖តុលា
មនុស្សរាប់ពាន់ម៉ឺននាក់បាននាំគ្នាសម្រុកទៅចូលរួមពិធីបុណ្យសពស្តេចបាល់ទាត់Pele នាថ្ងៃចុងក្រោយនៅទីក្រុង Santos ប្រទេសប្រេស៊ីល ថ្ងៃអង្គារ ទី ៣ ខែមករា ឆ្នាំ២០២៣។
យោងតាមសេចក្តីរាយការណ៍ដោយក្រុមការងារសារព័ត៌មានស៊ីអិនអិន បានឲ្យដឹងថាក្បួនដង្ហែសពរបស់លោក Pelé បានចាប់ផ្តើមឡើងយ៉ាងឱឡារិកនៅឯកីឡដ្ឋាន Urbano Caldeira ដែលជាផ្ទះរបស់អតីតក្លឹប Santos របស់ Pelé ខណៈមឈូសរបស់គាត់ត្រូវបានគេដឹកតាមដងផ្លូវនៃទីក្រុង Santos បន្តទៅកាន់ទីបញ្ចុះសព Memorial Necrópole Ecumênica ជាកន្លែងដែលពិធីបុណ្យសពឯកជនបែបគ្រួសារលោក Pelé នឹងត្រូវធ្វើឡើង។ ប្រភពពីស៊ីអិនអិន បានបន្តថា ច្រកទ្វារទៅកាន់កីឡដ្ឋានត្រូវបានបិទដោយអ្នកកាន់ទុក្ខរាប់ពាន់នាក់នៅតែតម្រង់ជួរ ហើយមនុស្សត្រូវបានបង្វែរឲ្យចេញខ្លះ ដើម្បីកុំឲ្យកកស្ទះខ្លាំងពេក។ ហ្វូងមនុស្សយ៉ាងច្រើនរហូតដល់ ២៣០០០០នាក់បានតម្រង់ជួរតាមដងផ្លូវ គ្រវីទង់ជាតិ និងអបអរសាទរនៅពេលដែលមឈូសបានឆ្លងកាត់។
ជាកិត្តិយសសម្រាប់ក្រុមគ្រួសារសព ប្រធានាធិបតីប្រេស៊ីល Lula da Silva ក៏បានចូលរួមពិធីផងដែរ ជាមួយនឹងការរឹតបន្តឹងសន្តិសុខ “យ៉ាងខ្លាំង” ដើម្បីសម្រួលដល់វត្តមានរបស់ប្រធានាធិបតី។ Lula បាននិយាយកាលពីថ្ងៃអង្គារថា “Pele គឺមិនអាចប្រៀបផ្ទឹមបាន ក្នុងនាមជាអ្នកលេងបាល់ទាត់ និងជាមនុស្ស” ។
សូមរំលឹកថា Pelé ដែលជាម្ចាស់ជើងឯក World Cup 3 ជំនាន់រូបនេះបានទទួលមរណភាពកាលពីថ្ងៃព្រហស្បតិ៍ ទី ២៩ ខែធ្នូ ឆ្នាំ២០២២ ក្នុងអាយុ ៨២ ឆ្នាំដោយសារការបរាជ័យនៃសរីរាង្គជាច្រើនដោយសារតែការវិវត្តនៃជំងឺមហារីកពោះវៀនធំ៕
