ភ្នំពេញ៖ លោកស្រី វេជ្ជបណ្ឌិត ម៉ៅ ដានីម្ចាស់បន្ទប់ពិគ្រោះជំងឺនិងពិនិត្យរោគស្ត្រីបាននាំក្រុមគ្រូពេទ្យមពិនិត្យព្យាបាល និង ប្រឹក្សាយោបល់ជូនប្រជាពលរដ្ឋនៅខណ្ឌព្រែកព្នៅដោយមិនគិតថ្លៃរយៈពេលមួយថ្ងៃពេញ គឺនាថ្ងៃទី២៥ខែ ធ្នូ ឆ្នាំ២០២២។
ប្រជាពលរដ្ឋជិត២០០នាក់ មកពីសង្កាត់ផ្សេងៗនៃខណ្ឌព្រែកព្នៅ បានអញ្ជើញមកទទួលការពិនិត្យព្យាបាលដោយសេចក្តីរីករាយនិងពេញចិត្តចំពោះការយកចិត្តទុកដាក់របស់ក្រុមគ្រូពេទ្យ និង អាជ្ញាធរមូលដ្ឋាន។
លោក ធីម សំអាន អភិបាលខណ្ឌព្រែកព្នៅ បានមានប្រសាសន៍ថា៖លោកស្រីវេជ្ជបណ្ឌិត ម៉ៅ ដានី បាននាំក្រុមគ្រូពេទ្យមកព្យាបាលប្រជាពលរដ្ឋក្នុងសង្កាត់សំរោងមិនគិតថ្លៃ។ការព្យាបាលនេះផ្ដោតទៅលើរោគស្ត្រីនិងជំងឺទូទៅដោយមានការចូលរួមពីប្រជាពលរដ្ឋជាច្រើនរយនាក់នាក់។ក្នុងនាមរដ្ឋបាលខណ្ឌព្រែកព្នៅ លោកសូមថ្លែងអំណរគុណអស់ពីចិត្តចំពោះការយកចិត្តទុកដាក់របស់ក្រុមគ្រូពេទ្យជាពិសេសលោកស្រីវេជ្ជបណ្ឌិតម៉ៅ ដានី។
លោកបានមានប្រសាសន៍ទៀតថា៖ជំងឺស្ត្រីឬរោគស្ត្រីគឺជាជំងឺដែលគួរយកចិត្តទុកដាក់។លោកបានសំណូមពរដល់ស្ត្រីទាំងអស់ក្នុងខណ្ឌព្រែកព្នៅយកចិត្តទុកដាក់ពិនិត្យសុខភាពនិងថែទាំសុខភាពឱ្យបានល្អ។ជាពិសេសនៅរដូវធ្លាក់ខ្យល់នេះសូមបងប្អូនប្រជាពលរដ្ឋប្រយ័ត្នប្រយែងថែទាំសុខភាពឱ្យបានល្អដើម្បីជៀសវាងជំងឺដម្កាត់ផ្សេងៗ។
លោកស្រីវេជ្ជបណ្ឌិតម៉ៅ ដានី បានលើកឡើងថា៖ជំងឺស្ត្រីតែងតែកើតឡើងនៅកម្ពុជាដូចជាជំងឺកាមរោនិងរោគផ្សិតជាដើមលោកស្រីមកទីនេះមិនត្រឹមតែព្យាបាលជូនប្រជាពលរដ្ឋមិនគិតថ្លៃនោះទេ តែបានពន្យល់និងផ្ដល់ការប្រឹក្សាយោបល់អំពីការថែទាំសុខភាពជាពិសេសរោគស្ត្រី និងសុខភាពផ្លូវភេទ។កាលណាសុខភាពផ្លូវភេទនិងរាងកាយមាំមួនល្អវានឹងផ្ដល់សុភមង្គលនិងមិនខាតបង់ថវិកាលុយកាក់និងចូលរួមកាត់បន្ថយភាពក្រីក្រផងដែរ។លោកស្រីបានបន្តថា៖រោគស្ត្រីអាចប៉ះពាល់ដល់ស្ត្រីខ្លាំងស្ត្រីត្រូវហ៊ានបើកចំហនិយាយពីបញ្ហាស្ត្រីកុំខ្មាសអៀន។
លោកស្រីវេជ្ជបណ្ឌិត បានឱ្យដឹងថាៈលោកស្រីមានគោលដៅបន្តបន្ទាប់ទៀតដើម្បីចុះជួយពិនិត្យព្យាបាលប្រជាពលរដ្ឋរាល់២ខែម្ដងដោយឥតគិតថ្លៃ។លោកស្រីនឹងយកបទពិសោធន៍ព្យាបាលរោគស្រី្តដែលមានជាង១០ឆ្នាំចែករំលែកចំណេះដឹងនិងវិធីសាស្ត្រថែរក្សាសុខភាពក៏ដូចជាបណ្ដុះបណ្ដាលគ្រូពេទ្យជំនាន់ថ្មីៗ។ស្ត្រីនិងយុវវ័យសម័យថ្មីគួរតែឈប់អៀនខ្មាស់មកពិនិត្យពិគ្រោះឆែកសុខភាពផ្លូវពេទ្យ។
លោក ប៉ាង សុផល អាយុ៧៨ឆ្នាំរស់នៅភូមិសំរោងកណ្ដាលសង្កាត់សំរោងខណ្ឌព្រែកព្នៅរាជធានីភ្នំពេញដែលបានមកទទួលការពិនិត្យសុខភាពជាតិស្ករនិងទទួលឱសថពីគ្រូពេទ្យបានមានប្រសាសន៍ថា៖លោកយល់ឃើញថាការមកពិនិត្យសុខភាពរបស់ក្រុមគ្រូពេទ្យជាការល្អប្រសើរណាស់សម្រាប់មនុស្ស ចាស់ដែលមានរោគានៅក្នុងខ្លួនជាពិសេសមិនគិតថ្លៃទៀតផង។លោកសំណូមពរឲ្យមានការចុះពិនិត្យសុខភាពដូច្នេះដល់ប្រជាពលរដ្ឋព្រោះប្រជាពលរដ្ឋត្រេកអរណាស់ដែលពិនិត្យសុខភាពមិនគិតថ្លៃដូច្នេះ។
លោកស្រី ដួង ជឿន នៅភូមិសំរោងជើង ឃុំសំរោង សង្កាត់សំរោងខណ្ឌព្រែកព្នៅរាជធានីភ្នំពេញបានឱ្យCFNដឹងថា៖គាត់បានមកពិនិត្យសុខភាពនៅទីនេះដោយសារលោកស្រីឈឺ សន្លាក់និងចុកឆ្អឹងខ្នង។បន្ទាប់បន្ទាប់ពីការត្រួតពិនិត្យសុខភាពរួច លោកស្រីបានទទួលថ្នាំសន្លាក់ពិសា។
លោកស្រីបានលើកឡើងថា៖ការមកពិនិត្យសុខភាពជូនប្រជាពលរដ្ឋនេះជាការល្អប្រសើរណាស់ដោយប្រជាជនបានពិនិត្យសុខភាពគ្រប់គ្នាជាពិសេសមិនចំណាយលុយកាក់។លោកស្រីចង់ឲ្យមានកម្មវិធីពិនិត្យសុខភាពនេះធ្វើឡើងឲ្យបានច្រើនដង។
លោកស្រី សេង គឺន អាយុ៥៦ឆ្នាំ រស់នៅភូមិសំរោងកណ្ដាល បាននិយាយថាគាត់មកពិនិត្យជំងឺក្រពះពោះវៀនតាមរយៈការជូនដំណឹងពីភូមិឃុំ។ការពិនិត្យសុខភាពនេះល្អណាស់ព្រោះប្រជាជនបានដឹងពីជំងឺរបស់ខ្លួននិងទទួលការព្យាបាល។លោកស្រីក៏សម្ដែងនូវការរីករាយនិងបង្ហាញបំណងចង់ឲ្យក្រុមគ្រូពេទ្យមកពិនិត្យទៀត៕ដោយៈផាវី
