ភ្នំពេញ៖ជិះម៉ូតូប៉ះគ្នាបន្តិចបន្តួច ជនដៃដល់បានដកកាំភ្លើងបាញ់១គ្រាប់ទៅលើបុរសម្នាក់ បណ្តាលឱ្យរងរបួសធ្ងន់ រួចជនសង្ស័យបានជិះរត់បាត់ សមត្ថកិច្ចកំពុងស្វែងរកចាប់ខ្លួន។
ហេតុការណ៍បង្កការភ្ញាក់ផ្អើលនេះបានកើតឡើងនៅតាមផ្លូវបេតុងជាប់របងវត្តសន្សំកុសល ក្នុងសង្កាត់បឹងទំពុនទី១ ខណ្ឌមានជ័យ កាលពីយប់ថ្ងៃទី១៩ ខែធ្នូ។ ប្រភពព័ត៌មានបានឱ្យដឹងថា មុនកើតហេតុ បុរសរងគ្រោះជិះម៉ូតូតាមផ្លូវបេតុងពីត្បូងទៅជើង ។
មកដល់កន្លែងខាងលើ ស្រាប់តែជនដៃដល់ជិះម៉ូតូមិនស្គាល់ម៉ាកនិងផ្លាកលេខមកពីមុខហើយបានប៉ះ ដៃចង្កូតគ្នាតែមិនដួលទេ។ពេលនោះជនសង្ស័យបានដកកាំភ្លើងបាញ់១គ្រាប់លើជនរងគ្រោះចំលើដោះ ធ្លាយមកក្រោយស្មារងរបួសធ្ងន់ ត្រូវពលរដ្ឋជួយដឹកទៅមន្ទីរពេទ្យរុស្ស៊ីដើម្បីសង្គ្រោះបន្ទាន់។
ចំណែកខ្មាន់កាំភ្លើងក្រោយពីបាញ់រួចក៏ជិះម៉ូតូគេចខ្លួនបាត់។បន្ទាប់ពីកើតហេតុ សមត្ថកិច្ចបានចុះពិនិត្យ និងយកវត្ថុតាងសម្បកគ្រាប់និងស្រាវជ្រាវស្វែងរកចាប់ជនដៃដល់យកមកផ្ដន្ទាទោសតាមច្បាប់៕ដោយ៖វិចិត្រ