ខ្សែបម្រើ Sergio Busquets បាននិយាយថា ការរងបរាជ័យរបស់ក្រុមអេស្ប៉ាញ ៣-០ ដោយការស៊ុតបាល់ប៉េណាល់ទីកាត់ក្ដី ក្រោមស្នាដៃរបស់ក្រុមម៉ារ៉ុក គឺជាវិធីសម្រេចជោគវាសនាដ៏សែនឈឺចាប់បំផុត សម្រាប់ការប្រកួតវគ្គ ១៦ក្រុមចុងក្រោយ ក្នុងព្រឹត្តិការណ៍ World Cup កាលពីថ្ងៃអង្គារ បន្ទាប់ពីក្រុមទាំង ២ ប្រកួតក្នុងម៉ោងធម្មតា និងម៉ោងបន្ថែមពិសេស ១៥នាទី ២ដង ស្មើគ្នា ០-០។
ការស៊ុតបាល់របស់កីឡាករ Busquets ត្រូវបានសង្គ្រោះដោយអ្នកចាំទី Yassine Bounou ខណៈដែលក្រុមម្ចាស់ជើងឯក World Cup 2010 មិនអាចទម្លុះសំណាញ់ទីបានសូម្បី ១គ្រាប់ ពីការទាត់បាល់ប៉េណាល់កាត់ក្ដីនេះ។
កីឡាករ Busquets បាននិយាយថា៖ «វាជារឿងគួរឱ្យសោកស្ដាយខ្លាំងណាស់។ វាត្រូវបានសម្រេចដោយការទាត់ប៉េណាល់ទី ដែលជាវិធីសម្រេចដ៏គួរឈឺចាប់បំផុត។ វាពិតជាតានតឹងនិងពិបាកណាស់ សម្រាប់ពួកយើង។ យើងបានប្រឹងប្រែងជម្នះវា តែយើងខ្វះសំណាងតិចតួច សម្រាប់គ្រាប់បាល់ចុងក្រោយ»។
ក្រុមគោជល់អេស្ប៉ាញ ក៏ធ្លាក់ពីព្រឹត្តិការណ៍ Euro 2020 ក្នុងវគ្គពាក់កណ្តាលផ្តាច់ព្រ័ត្រ ដោយសារចាញ់ក្រុមអ៊ីតាលី ក្នុងវគ្គប៉េណាល់ទីនេះដែរ។ កីឡាករ Busquets វ័យ ៣៤ឆ្នាំ នឹងមិនសម្រេចភ្លាមៗនោះឡើយថា តើរូបគេនឹងបន្តលេងបាល់ទាត់លក្ខណៈអន្តរជាតិទៀត ឬយ៉ាងណា?
កីឡាកររបស់ក្រុមអ្នកមានបុណ្យ Barcelona រូបនេះ បាននិយាយថា៖ «ឥឡូវនេះអ្វី ដែលសំខាន់បំផុត គឺក្រុមជម្រើសជាតិ មិនមែនខ្ញុំទេ។ វាជារាត្រីដ៏តានតឹងមួយ ហើយយើងត្រូវតែប្រឹងងើបឡើងវិញ ហើយយកវាជាបទពិសោធន៍ សម្រាប់ការប្រកួតរបស់យើង។ នៅមានកីឡាករក្មេងៗជាច្រើនទៀត ដែលនឹងជួយក្រុមនាពេលអនាគត»៕