នៅទីបំផុត ខ្សែប្រយុទ្ធឆ្នើម Lionel Messi ស៊ុតបញ្ចូលទីបាន ១គ្រាប់ហើយ ក្នុងវគ្គចាញ់ធ្លាក់ នៅឯព្រឹត្តិការណ៍ World Cup កាលពីថ្ងៃសៅរ៍ ខណៈដែលរូបគេបានជួយជំរុញឱ្យក្រុមជម្រើសជាតិអាហ្សង់ទីនឈ្នះក្រុមអូស្ត្រាលី ២-១ ដែលជាលទ្ធផលបង្កើតបាននូវការប្រកួតគួរឱ្យចង់មើលបំផុត ក្នុងវគ្គ ១/៤ ផ្តាច់ព្រ័ត្រ ដោយត្រូវប៉ះជាមួយក្រុមហូឡង់ ដែលបានបង្ហាញពីភាពខ្លាំងរបស់ខ្លួន ក្នុងការទម្លាក់ក្រុមសហរដ្ឋអាមេរិក នៅមុននោះ។
ប្រធានក្រុមអាហ្សង់ទីន កីឡាករ Messi បានធ្វើការបង្ហាញខ្លួន ក្នុងការប្រកួតលក្ខណៈអាជីពជាលើកទី ១ ០០០ ជាមួយនឹងគ្រាប់បាល់ចំនួន៧៨៩ របស់ខ្លួន ដើម្បីមកស៊ុតបញ្ចូលទីគ្រាប់បាល់បើកឆាក ក្នុងវគ្គទី១ សម្រាប់ហ្គេម ក្នុងវគ្គ ១៦ក្រុមចុងក្រោយ នៅឯកីឡដ្ឋាន Ahmad bin Ali ក្នុងទីក្រុងដូហា។
វាជាការបញ្ចប់ទីយ៉ាងល្អប្រណីតមួយពីកីឡាករម្នាក់ ដែលបានបង្ហាញខ្លួន ក្នុងការប្រកួតបាល់ទាត់ World Cup ជាលើកទី៥ របស់រូបគេ ប៉ុន្តែដែលនៅមុននេះមិនធ្លាប់រកគ្រាប់បាល់បានសោះឡើយ ក្នុងវគ្គចាញ់ធ្លាក់នេះ សម្រាប់ការប្រកួតប្រជែង ដែលរូបគេកំពុងស្វះស្វែងរកការឈ្នះជើងឯកជាលើកដំបូង នៅវ័យ ៣៥ឆ្នាំ។
វាមើលទៅទំនងហាក់ដូចជាក្រុមអាហ្សង់ទីន នឹងធ្វើដំណើរកាន់តែឆ្ងាយហើយ ក្នុងការប្រកួតនេះ នៅពេលដែលកីឡាករ Julian Alvarez បានទាញយកផលពីកំហុសរបស់អ្នកចាំទី ដើម្បីបង្កើនការនាំមុខរបស់ក្រុមអាហ្សង់ទីនទ្វេដង ពេលហ្គេមដំណើរការជិតបាន ១ម៉ោង។ ប៉ុន្តែ ក្រុមអូស្ត្រាលី វាយបកបាន ១គ្រាប់វិញ នៅពេលដែលកីឡាករ Craig Goodwin បានស៊ុតបាល់ទៅប៉ះក្បាលរបស់កីឡាករ Enzo Fernandez ហើយប្លាតចូលទី នៅនាទីទី៧៧ ខណៈលទ្ធផលនោះបានបន្តរហូតដល់ចប់ការប្រកួតផ្លូវការ។
ក្រោយចប់ការប្រកួត កីឡាករ Messi បានប្រាប់ទូរទស្សន៍របស់ប្រទេសអាហ្សង់ទីនថា៖ «វាជាការប្រកួត ដែលមានការប៉ះទង្គិចដោយរាងកាយពិតៗ ប៉ុន្តែខ្ញុំសប្បាយចិត្តជាខ្លាំងជាមួយនឹងការទទួលបានជ័យជម្នះ ដោយយើងបានបោះជំហានទៅមុខបន្តិចទៀតហើយ»។
ក្រុមអាហ្សង់ទីន ជាក្រុមមួយ ក្នុងចំណោមក្រុម ដែលត្រូវបានចាត់ទុកថា មានសិទ្ធិខ្ពស់ក្នុងការឈ្នះពានរង្វាន់នេះ មុនការព្រឹត្តិការណ៍នេះចាប់ផ្ដើម ហើយពួកគេងើបឡើងវិញបានយ៉ាងល្អប្រសើរ ចាប់តាំងពីរងបរាជ័យ ដោយសារក្រុមអារ៉ាប៊ីសាអូឌីត ក្នុងការប្រកួតបើកឆាករបស់ខ្លួន រហូតដល់បានឡើងទៅវគ្គ ៨ក្រុមចុងក្រោយ។
ឥឡូវនេះ ក្រុមពពកសអាហ្សង់ទីន អាចទន្ទឹងរង់ចាំការប្រកួតវគ្គបន្ទាប់ នៅថ្ងៃសុក្រក្រោយ ទល់នឹងក្រុមហូឡង់ ជាគូប្រកួត ដែលបានបង្កើតនូវការចងចាំមួយចំនួននៃការប្រកួត នៅ World Cup នេះ ក្នុងនោះរួមទាំងវគ្គផ្តាច់ព្រ័ត្រឆ្នាំ១៩៧៨ ដែលក្រុមតំបន់អាមេរិកឡាទីន ជាអ្នកឈ្នះ ហើយនិងវគ្គ ១/៤ ផ្តាច់ព្រ័ត្រ ឆ្នាំ១៩៩៨ ដែលពេលនោះត្រូវបានសម្រេចដោយគ្រាប់បាល់យ៉ាងអស្ចារ្យពីកីឡាករ Dennis Bergkamp របស់ក្រុមហូឡង់។
សម្រាប់ក្រុមពណ៌ទឹកក្រូចហូឡង់ ក្រុមរបស់លោក Louis van Gaal មួយនេះ ក៏បានចាប់ផ្តើមមិនជាលេចធ្លោណាស់ណានោះទេ នៅកាតានេះ ប៉ុន្តែពួកគេនៅតែឈរនៅលើគេ ក្នុងពូលរបស់ខ្លួន ហើយកាលពីថ្ងៃសៅរ៍ ពួកគេក៏មិនទាន់បានបង្ហាញឱ្យឃើញពីទម្រង់លេងដ៏ល្អបំផុតរបស់ពួកគេនៅឡើយដែរ ដើម្បីយកឈ្នះក្រុមអាមេរិក ក្នុងលទ្ធផល ៣-១ នោះ។
ជ័យជម្នះរបស់ពួកគេ ត្រូវបានបង្កើតឡើងដោយគ្រាប់បាល់បើកឆាកដំបូងដ៏អស្ចារ្យ នៅកីឡដ្ឋាន Khalifa International នេះ ដោយកីឡាករ Memphis Depay បានទម្លុះសំណាញ់ទី បន្ទាប់ពីការបញ្ជូនបាល់ឱ្យគ្នាចំនួន ២០ដង។ កីឡាករ Daley Blind ជាអ្នករកបានគ្រាប់ទី២ ហើយកីឡាករ Denzel Dumfries ស៊ុតគ្រាប់បាល់ជ័យជម្នះចុងក្រោយ បន្ទាប់ពីកីឡាករ Haji Wright ជួយឱ្យក្រុមអាមេរិកតាមពីក្រោយ ២-១។
លោក Van Gaal បាននិយាយថា៖ «យើងតែងតែចង់ធ្វើឱ្យប្រសើរឡើង ហើយចាប់តាំងពីការចាប់ផ្តើមនៃការប្រកួតប្រជែងនេះ វាកាន់តែមានភាពប្រសើរឡើងៗ ហើយកាន់តែប្រសើរឡើងៗ ពី ១ប្រកួត ទៅ ១ប្រកួត»៕
