ក្រុមជម្រើសជាតិស្វីស បានកក់កៅអី នៅវគ្គ ១៦ក្រុមចុងក្រោយ ដោយត្រូវឡើងទៅជួបក្រុមព័រទុយហ្គាល់ ក្នុងព្រឹត្តិការណ៍ FIFA World Cup 2022 នៅប្រទេសកាតា កាលពីថ្ងៃសុក្រ បន្ទាប់ពីបានយកឈ្នះក្រុមស៊ែប៊ី ៣-២ ក្នុងការប្រកួតដ៏តានតឹង ដែលបានធ្វើឱ្យពួកគេបញ្ចប់នូវចំណាត់ថ្នាក់លេខ ២ ក្នុងពូល G។
ខ្សែបម្រើ Xherdan Shaqiri បានជួយឱ្យក្រុមស្វីសនាំមុខមុន ប៉ុន្តែគ្រាប់បាល់ពីខ្សែប្រយុទ្ធ Aleksandar Mitrovic និង Dusan Vlahovic នាំឱ្យក្រុមស៊ែប៊ីជាអ្នកនាំមុខម្ដង មុនពេលខ្សែប្រយុទ្ធ Breel Embolo ធ្វើឱ្យក្រុមទាំង ២ ស្មើគ្នា ២-២ នៅនាទីចុងក្រោយនៃវគ្គទី ១។
គ្រាប់បាល់ដ៏ស្អាតអស្ចារ្យបស់ខ្សែបម្រើ Remo Freuler ពេលការប្រកួតចាប់ផ្ដើម នៅវគ្គទី ២ ត្រឹម ៣នាទី គឺជាគ្រាប់បាល់ជ័យជម្នះ ដែលបញ្ជូនក្រុមស្វីសទៅបង្ហាញខ្លួន ក្នុងវគ្គចាញ់ធ្លាក់ជាលើកទី ៤ ពីការប្រកួតប្រជែង នៅ World Cup ចំនួន ៥ដង។
ប្រធានក្រុមស្វីស កីឡាករ Granit Xhaka បាននិយាយថា៖ «វាជាហ្គេម ដែលច្របូកច្រល់ជាមួយនឹងអារម្មណ៍ជាច្រើន ប៉ុន្តែជារួម ការប្រកួតគឺមានភាពយុត្តិធម៌។ យើងចង់ផ្តោតលើបាល់ទាត់ និងឈ្នះការប្រកួត ហើយយើងសម្រេចបាន។ ឥឡូវនេះ យើងស្ថិតក្នុងវគ្គ ១៦ក្រុម ហើយយើងមានមោទនភាពណាស់»។
អារម្មណ៍ស្អប់ខ្ពើម បានបំផ្លាញជំនួប រវាងក្រុមទាំង ២ ក្នុងការប្រកួត កាលពីឆ្នាំ២០១៨ នៅពេលដែលកីឡាករ Xhaka និង Shaqiri អបអរការស៊ុតបញ្ចូលទី ដោយធ្វើកាយវិការគាំទ្រប្រទេសកូសូវ៉ូ ដែលធ្វើឱ្យប្រជាជនស៊ែប៊ីខឹងសម្បាយ៉ាងខ្លាំង។
អារម្មណ៍បែបនោះ បានពុះកញ្ជ្រោលឡើងទៀត នៅក្នុងវគ្គទី២ ក្នុងប្រទេសកាតា កាលពីថ្ងៃសុក្រ បន្ទាប់ពីក្រុមស៊ែប៊ី បានប្តឹងទាមទារការទាត់បាល់ពិន័យ ១១ម៉ែត្រ ដោយអ្នកប្រកាសប្រចាំកីឡដ្ឋាន បានអំពាវនាវឱ្យបញ្ចប់ការស្រែកច្រៀង និងការធ្វើកាយវិការរើសអើងគ្រប់យ៉ាងទាំងអស់ ប្រហែល ១៥នាទីក្រោយមក។
សម្រាប់ពូល G នេះ ក្រុមប្រេស៊ីល និងស្វីស ធ្វើដំណើរទៅវគ្គបន្ត ក្នុងនាមជាក្រុមលេខ ១ និងលេខ ២ រីឯក្រុមកាមេរូន និងស៊ែប៊ី ត្រូវហោះត្រឡប់ទៅប្រទេសវិញដូចគ្នា៕
