ភ្នំពេញ៖ ឥឡូវនេះ ប្រជាពលរដ្ឋដែលមានរថយន្តអគ្គិសនី អាចចូលមកសាកថ្មបាននៅទីស្ដីការក្រសួងសាធារណការ និងដឹកជញ្ជូនបន្ទាប់ពីម៉ាស៊ីនបញ្ចូលថាមពលយានយន្តអគ្គិសនីចំនួន ៣បន្ថែមទៀត បានត្រូវដំឡើងរួចរាល់នាពេលថ្មីៗនេះ។
ស្ថានីយបញ្ចូលថាមពលយានយន្តអគ្គិសនី (EV Charging Station) ថ្មីនេះមានទីតាំងស្ថិតនៅក្នុងទីស្តីការក្រសួងសាធារណការ និងដឹកជញ្ជូនជាស្ថានីយដែលប្រក់ដោយដំបូលសូឡាប្រើប្រាស់ថាមពលពន្លឺព្រះអាទិត្យ។ស្ថានីយនេះមានម៉ាស៊ីនបញ្ចូលថាមពលអគ្គិសនីចំនួន០៣ (មានដៃបញ្ចូលថាមពលអគ្គិសនីចំនួន០៦) ហើយអាចសាកបានចំពោះរថយន្តអគ្គិសនីគ្រប់ប្រភេទ។
ក្នុងពិធីប្រគល់-ទទួលយានយន្តអគ្គិសនី និងសម្ពោធស្ថានីយបញ្ចូលថាមពលយានយន្តអគ្គិសនីនៅទីស្តីការក្រសួង នាពេលកន្លង មកនេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា៖ស្ថានីយជាង២០០ទីតាំងទៀតគ្រោងនឹងដំឡើងទូទាំងប្រទេស។កំណើនការចុះបញ្ជីយានយន្តអគ្គិសនីក្នុងរយៈពេល១០ខែចុងក្រោយ គឺមានការកើនឡើងជាង១១ដង បើធៀបទៅនឹងរយៈពេលដូចគ្នាក្នុងឆ្នាំ២០២១ ដែលនេះបង្ហាញឱ្យឃើញពីការយល់ដឹង និងការចូលរួមប្រើប្រាស់យានយន្តអគ្គិសនីគួរឱ្យកត់សម្គាល់នៅកម្ពុជា។
លោកទេសរដ្ឋមន្ត្រី ក៏បានបង្ហាញពីកិច្ចសហការកន្លងមករបស់រាជរដ្ឋាភិបាលជាមួយដៃគូអភិវឌ្ឍន៍នានារួមមាន៖ (១)កម្មវិធីអភិវឌ្ឍន៍សហប្រជាជាតិ(UNDP) បានផ្តល់ម៉ាស៊ីនបញ្ចូលថាមពលយានយន្តអគ្គិសនីចំនួន ៤គ្រឿង (២) ក្រុមហ៊ុន EV Energy Tech Co., Ltd. បានផ្ដល់នូវសម្ភារបិក្ខារ ដំបូលសូឡា និងហេដ្ឋារចនាសម្ព័ន្ធសម្រាប់ដំឡើងស្ថានីយបញ្ចូលថាមពលយានយន្តអគ្គិសនីប្រើប្រាស់ថាម ពលពន្លឺព្រះអាទិត្យ ដោយបំពាក់ម៉ាស៊ីនបញ្ចូលថាមពលអគ្គិសនីចំនួន ៣គ្រឿង មានដៃបញ្ចូលថាមពលអគ្គិសនីចំនួន៦ មានទីតាំងស្ថិតក្នុងទីស្ដីការក្រសួង ដែលធ្វើការសម្ពោធក្នុងឱកាសនេះផ្ទាល់៕ដោយៈសិរីមតី