សៀមរាប៖ក្រុមហ៊ុនទេសចរណ៍បរទេសចំនួន២ កំពុងសហការជាមួយសមាគមដឹកជញ្ជូនទេសចរណ៍កម្ពុជាTTA DRIVER ដើម្បីបង្កើតកម្មវិធីឌីជីថលMaaS ដែលអាចបង្កការងាយស្រួលដល់ភ្ញៀវជាតិនិងអន្តរជាតិអាចប្រើសេវាដឹកជញ្ជូនតាមប្រព័ន្ធ Digital ទូរស័ព្ទចល័តដែលជាកម្មវិធីមួយជួយសម្រួលដល់ការបញ្ជាក់ពីចម្ងាយ នៃសេវាដឹកជញ្ជូនជាមួយក្រុមហ៊ុន ឬភ្នាក់ងារទេសចរណ៍ ឱ្យមានប្រសិទ្ធិភាពជាងមុន ។
ក្រុមហ៊ុន SOKEN Incនៃប្រទេសកាណាដានិងក្រុមហ៊ុន Haystack Labs Studio Co., Ltdនៃប្រទេសជប៉ុន បានចុះអនុស្សរណៈនៃការយោគយល់គ្នា ជាមួយសមាគមដឹកជញ្ជូនទេសចរណ៍ប្រចាំអាកាសយានដ្ឋានអន្តរជាតិសៀមរាបTTA DRIVER រួចហើយ កាលពីរសៀលថ្ងៃទី៣០ខែវិច្ឆិកា ឆ្នាំ២០២២។
ប្រធានការិយាល័យស្ថានកុងស៊ុលកាណាដាប្រចាំកម្ពុជាលោក Jan SCAZIGHINO មានប្រសាសន៍ថាឥឡូវនេះយើងដឹងហើយថាប្រទេសកម្ពុជាកំពុងមានការផ្ដល់ជូននូវសេវាកម្មដឹកជញ្ជូនអ្នកដំណើរទេសចរណ៍ល្អបំផុតលើពិភពលោក ជាមួយនិងប្រាសាទអង្គវត្ត ហើយការចូលរួមរបស់ក្រុមហ៊ុន Haystackគឺជាកិត្តយសនិងភាពជាឯកសិទ្ធមួយសម្រាប់យើង។
លោក Jan SCAZIGHINO ថ្លែងទៀតថានាយករដ្ឋមន្ដ្រីនៃប្រទេសកាណាដា Justin Trudeau បានធ្វើដំណើរទស្សនកិច្ចនៅប្រទេសកម្ពុជា ស្របពេលនោះយើងក៏បានសម្រេចចិត្តលើគោលបំណងមួយសម្រាប់តំបន់អាស៊ាន ដើម្បីអោយប្រទេសកាណាដាក្លាយជាដៃគូរសហការផ្នែកពាណិជ្ជកម្មនិងអាជីវកម្មសម្រាប់អាស៊ាន។មានន័យថាផ្នែកពាណិជ្ជកម្មនិងអាជីវកម្មរបស់យើងកំពុងស្ថិតនៅក្នុងការចរចារដ៏ស៊ីជម្រៅមួយសម្រាប់កិច្ចព្រមព្រៀងរវាងអាស៊ាននិងកាណាដា។
ចំណែកប្រធានការិយាល័យកុងសុលជប៉ុន ប្រចាំខេត្តសៀមរាបលោក Masaki KAWAGUCHI មានប្រសាសន៍ថា ៖ការអភិវឌ្ឍន៍កម្មវិធី ឌីជីថល MaaS គឺជាកម្មវិធីមួយសម្រួលដល់ការបញ្ជាក់ពីចម្ងាយនៃសេវាដឹកជញ្ជូនរបស់ក្រុមហ៊ុន ឬទីភ្នាក់ងារទេសចរណ៍ ឱ្យមានប្រសិទ្ធិភាពជាងមុន ។លោក Masaki KAWAGUCHIក៏រំពឹងថាការបើកដំណើរការព្រលានយន្តហោះថ្មីនៅឆ្នាំក្រោយអាចនឹងផ្តល់ក្តីសង្ឃឹមនៃកំណើនភ្ញៀវទេសចរណ៍មកកាន់ទឹកដីប្រវត្តិសាស្ត្រកម្ពុជាមួយនេះ។លោកសង្ឃឹមថាគម្រោងកម្មវិធីឌីជីថល MaaS នឹងត្រូវបានគាំទ្រ មិនត្រឹមតែសម្រាប់អ្នកទេសចរប៉ុណ្ណោះទេ តែក៍សម្រាប់គ្រប់ភាគីពាក់ព័ន្ធ ក្នុងវិស័យទេសចរណ៏ និង ប្រជាពលរដ្ឋដែលរស់នៅទីនេះផងដែរ។
ប្រធានសមាគមក្លឹបទេសចរណ៍សៀមរាបលោក កៅ ហ្វីលីពថ្លែងថារាជរដ្ឋាភិបាលកម្ពុជាបានដាក់ចេញរួចហើយនូវអនុសាសន៍នៃផែនការមេអភិវឌ្ឍន៍ទេសចរណ៏ខេត្តសៀមរាប ឆ្នាំ២០២១-២០៣៥ អនុសាសន៍នោះបានស្នើរដល់គ្រប់ភាគី ពាក់ព័ន្ធទាំងអស់ ត្រូវផ្តល់អាទិភាពដល់ការដាក់អោយអនុវត្តជាក់ស្តែង នូវផែនការមេនេះ ដើម្បីរួមចំណែកក្នុងការលើកកម្ពស់ វិស័យទេសចរណ៏ ដែលជាមាសបៃតងយ៉ាងពិតប្រាកដនិងដើម្បីសម្រេចនូវគោលដៅអភិវឌ្ឍន៍ ប្រកបដោយចីរភាពនៅឆ្នាំ២០៣០។
តំណាងរាស្ត្រមណ្ឌលសៀមរាបអ្នកឧកញ៉ា សៀង ណាំ បានហៅការផ្តួចផ្តើមរៀបចំកម្មវិធីឌីជីថល MaaS ដែលរៀបចំឡើងបំណងឱ្យអ្នកប្រកបរបរដឹកជញ្ជូនភ្ញៀវទេសចរណ៍នៃសមាគមដឹកជញ្ជូនទេសចរណ៍ប្រចាំអាកាសយានដ្ឋានអន្តរជាតិសៀមរាប(TTA)ប្រើប្រាស់នេះគឺជាការបង្កលក្ខណៈជួយសម្រួលដល់ការកក់យានជំនិះពីបណ្តារ សណ្ឋាគារ ឬភ្នាក់ងារទេសចរណ៍ កាន់តែមានប្រសិទ្ធិភាពជាងមុន៕ដោយៈសិរីមតី