គ្រូបង្វឹករបស់ក្រុមជម្រើសជាតិបែលហ្ស៊ិក លោក Roberto Martinez បាននិយាយថា គាត់នឹងចាកចេញពីការងាររបស់គាត់ បន្ទាប់ពីក្រុមរបស់គាត់ បានធ្លាក់ចេញពីព្រឹត្តិការណ៍ World Cup 2022 នៅប្រទេសកាតា បន្ទាប់ពីប្រកួតស្មើ ០-០ ជាមួយក្រូអាស៊ី ក្នុងការប្រកួតចុងក្រោយ កាលពីថ្ងៃព្រហស្បតិ៍។
គ្រូបង្វឹកវ័យ ៤៩ឆ្នាំរូបនេះ បានចូលមកកាន់តំណែង តាំងពីឆ្នាំ២០១៦ ហើយកិច្ចសន្យារបស់គាត់ នឹងផុតកំណត់ ក្រោយចប់កម្មវិធីប្រកួតប្រជែងដ៏ធំរបស់ពិភពលោកនេះ។
លោក Martinez បាននិយាយនៅឯសន្និសីទសារព័ត៌មាន ក្រោយការប្រកួតថា៖ «នោះជាហ្គេមចុងក្រោយរបស់ខ្ញុំជាមួយក្រុមជម្រើសជាតិ ខ្ញុំមិនអាចបន្តបានទៀតទេ។ វាជាពេលវេលា ដែលខ្ញុំត្រូវទទួលយកថា នេះគឺជាការដឹកនាំ សម្រាប់ការប្រកួតចុងក្រោយ»។
លោក Martinez បានដឹកនាំក្រុមបិសាចបែលហ្ស៊ិកឱ្យទទួលបានចំណាត់ថ្នាក់លេខ ៣ កាលពី World Cup 2018 នៅប្រទេសរុស្ស៊ី និងឡើងដល់វគ្គ ១/៤ ផ្តាច់ព្រ័ត្រ ក្នុងព្រឹត្តិការណ៍ Euro 2020 កាលពីឆ្នាំមុន។ ប៉ុន្តែក្រុមវ័យចំណាស់របស់គាត់ មិនអាចកូពីទម្រង់លេងបែបនោះ មកបង្ហាញនៅប្រទេសកាតាបានឡើយ ដោយខ្ទាតចេញពីកម្មវិធីនេះ ជាមួយនឹងការស៊ុតបានតែ ១គ្រាប់ប៉ុណ្ណោះ ក្នុងចំណោម ៣ហ្គេម។
អ្នកចាត់ការសញ្ជាតិអេស្ប៉ាញរូបនេះ បាននិយាយថា គាត់តែងតែមានគម្រោងចាកចេញបន្ទាប់ពី World Cup នេះ។ គាត់បានប្រាប់ថា៖ «នោះគឺជាចុងបញ្ចប់ មិនថា អ្វីនឹងកើតឡើងក៏ដោយ ពោលគឺទោះបីជាយើងក្លាយជាជើងឯកពិភពលោក ឬក៏យើងបានធ្លាក់ត្រឹមវគ្គចែកពូលនេះក្ដី»។
«វាមិនមានអ្វីពាក់ព័ន្ធនឹងការធ្លាក់ក្នុងវគ្គចែកពូលនោះទេ។ ចាប់តាំងពីឆ្នាំ២០១៨ ខ្ញុំមានឱកាសជាច្រើន ក្នុងការចាកចេញ ដើម្បីទៅចាប់យកការងារជាអ្នកចាត់ការក្លិប ប៉ុន្តែខ្ញុំចង់បង្ហាញភាពស្មោះត្រង់។ ខ្ញុំមិនមែនលាលែងទេ វាគឺជាការបញ្ចប់នៃកិច្ចសន្យារបស់ខ្ញុំ»។ លោក Martinez បានបន្ថែម។
ក្រុមបែលហ្ស៊ិក បានធ្វើដំណើរឆ្ពោះមកកាន់ការប្រកួតចុងក្រោយ ក្នុងពូល F របស់ពួកគេនេះ ដោយត្រូវការឈ្នះជាចាំបាច់ ដើម្បីបានឡើងទៅវគ្គ ១៦ក្រុមចុងក្រោយ បន្ទាប់ពីឈ្នះក្រុមកាណាដា ១-០ និងចាញ់ក្រុមម៉ារ៉ុក ២-០។ ប៉ុន្តែពូលនេះ ក្រុមម៉ារ៉ុក និងក្រូអាស៊ី បានឆ្លងទៅវគ្គចាញ់ធ្លាក់ ក្នុងនាមជាក្រុមលេខ ១ និងលេខ ២៕