ប្រធានាធិបតីសហរដ្ឋអាម៉េរិក លោកចូបៃដិន បានជម្រាបប្រាប់ថា លោកមានឆន្ទៈជួបលោកពូទីនតែក្នុងករណីណាដែលពូទីនចង់បញ្ចប់សង្រ្គាមនៅអ៊ុយក្រែនប៉ុណ្ណោះ។
លោកបៃដិន បាននិយាយដូច្នេះនៅក្នុងសន្និសីទសារព័ត៌មាននៅសេតវិមានបន្ទាប់ពីកិច្ចពិភាក្សាជាមួយប្រធានាធិបតីបារាំង Emmanuel Macron កាលពីថ្ងៃទី ១ខែធ្នូ។ លោកថា “ខ្ញុំបានត្រៀមខ្លួននិយាយជាមួយលោកពូទីនរួចហើយ ប្រសិនបើវាជាការពិតដែលគាត់មានចំណាប់អារម្មណ៍ក្នុងការសម្រេចចិត្តចង់ស្វែងរកវិធីដើម្បីបញ្ចប់សង្គ្រាម។ លោកបន្តថា “ខ្ញុំនឹងនិយាយជាមួយលោក Putin ក្នុងលក្ខណៈបែបពិគ្រោះយោបល់រួមជាមួយសម្ព័ន្ធមិត្តណាតូប៉ុណ្ណោះ”។ យ៉ាងណាក៏ដោយ នៅពេលសួរបន្ថែមទៀត ថាតើគម្រោងជំនួបនេះនឹងអាចធ្វើឡើងភ្លាមៗ ឆាប់ៗ ឬអត់ បៃដិនថាមិនទាន់ដឹងច្បាស់ទេ ព្រោះគាត់ក៏មិនទាន់បានទាក់ទងដោយផ្ទាល់ទៅលោកពូទីនដែរ។
ចំពោះដំណឹងនេះ ទីក្រុងមូស្គូមិនបានឆ្លើយតបនោះទេ ខណៈអ្នកតាមដានព្រឹត្តិការណ៍បានវាយតម្លៃថា រុស្ស៊ីកំពុងគាំងគំនិតមិនដឹងត្រូវដើរផ្លូវណា ក្នុងពេលដែលស្ថានភាពនៅសមរភូមិមុខវាយអ៊ុយក្រែនមិនចូល៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា