ភ្នំពេញ៖ក្នុងពិធីបិទការប្រកួតកីឡាជាតិលើកទី៣ និងកីឡាជាតិជនពិការលើកទី១ ឆ្នាំ២០២២ នាថ្ងៃទី៣០ ខែវិច្ឆិកា ឆ្នាំ២០២២ នៅពហុកីឡដ្ឋានជាតិមរតកតេជោ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ ប្រធានគណៈកម្មាធិការជាតិអូឡាំពិកកម្ពុជាបានថ្លែង ថា កម្ពុជារំពឹងនឹងទទួលបានភ្ញៀវទេសចរអន្តរជាតិប្រមាណពី២៥ ទៅ៥០ម៉ឺននាក់ នៅក្នុងព្រឹត្តិការណ៍ SEA Games-ASEAN Para Games ឆ្នាំ២០២៣។
លោក ថោង ខុន បានលើកឡើងថាព្រឹត្តិការណ៍កីឡាជាព្រឹត្តិការណ៍ទេសចរណ៍ដ៏សំខាន់ ក្នុងឧស្សាហកម្មទេសចរណ៍សម័យទំនើប ដែលក្នុងនោះអង្គការទេសចរណ៍ ពិភពលោក បានបញ្ជាក់ថា ទេសចរកីឡាអន្តរជាតិនៅលើពិភពលោក មានចំនួនប្រមាណ ១២លាននាក់ ទៅ ១៥លាននាក់ ក្នុងមួយឆ្នាំស្មើនឹង ១០% នៃឧស្សាហកម្មទេសចរណ៍ពិភពលោក និងរកចំណូលបានប្រមាណ ៨០០លានដុល្លារក្នុងមួយឆ្នាំ។ យ៉ាងណាមិញការប្រកួតកីឡាបាល់ទាត់ FIFA World Cup នៅទីក្រុង Doha ប្រទេសកាតាបច្ចុប្បន្ននេះគេរំពឹងថានឹងមានភ្ញៀវទេសចរប្រមាណ ១លាន ៥សែននាក់ កំពុងធ្វើដំណើរ និងត្រៀមធ្វើដំណើរទៅទស្សនាកីឡាបាល់ទាត់ពិភពលោកនេះ។
«រីឯអំឡុងពេលព្រឹត្តិការណ៍ប្រកួតកីឡា SEA Games-ASEAN Para Games ឆ្នាំ២០២៣ ក៏កម្ពុជារំពឹងថានឹងទទួលបានភ្ញៀវទេសចរអន្តរជាតិប្រមាណពី ២៥ម៉ឺននាក់ ទៅ ៥០ម៉ឺននាក់ ផងដែរ»។ នេះបើតាម រដ្ឋមន្ត្រីក្រសួងទេសចរណ៍៕ដោយៈផាវី
