អ្នកប្រដាល់ជើងឯកពិភពលោក Saul Canelo Alvarez បានធ្វើការព្រមានចំពោះកីឡាករ Lionel Messi បន្ទាប់ពីមានវីដេអូមួយលេចឡើង ដែលបង្ហាញពីការអបអរនូវជ័យជម្នះពីការប្រកួតក្នុងព្រឹត្តិការណ៍ World Cup របស់ក្រុមជម្រើសជាតិអាហ្សង់ទីនលើក្រុមម៉ិកស៊ិក ដោយឃើញអាវរបស់ក្រុមជម្រើសជាតិម៉ិកស៊ិកនៅលើឥដ្ឋ។
វីដេអូដែលបានចែករំលែកនៅលើបណ្ដាញសង្គម បានបង្ហាញថា កីឡាករ Messi ហាក់ដូចជាជាន់អាវរបស់កីឡាករក្រុមម៉ិកស៊ិក ខណៈពេលដែលរូបគេនិងមិត្តរួមក្រុមរបស់ខ្លួន បានលោតអបអរនៅក្នុងបន្ទប់ផ្លាស់ប្តូររបស់ពួកគេ បន្ទាប់ពីដណ្ដើមបានជ័យជម្នះ ២-០ កាលពីថ្ងៃសៅរ៍។
«តើអ្នកបានឃើញ Messi កំពុងសម្អាតបន្ទប់ផ្លាស់សម្លៀកបំពាក់ជាមួយអាវ និងទង់ជាតិរបស់យើងទេ? រូបគេគួរតែសុំពរពីព្រះថា កុំឱ្យខ្ញុំជួបរូបគេឱ្យសោះ»។ នេះជាការសរសេររៀបរាប់របស់អត្តពលិកសញ្ជាតិម៉ិកស៊ិក Alvarez ដែលជាអ្នកប្រដាល់ជើងឯក ៤ទម្ងន់ផ្សេងគ្នា នៅលើបណ្ដាញសង្គម Twitter។
ការផ្ទុះកំហឹងរបស់អ្នកប្រដាល់ Alvarez ត្រូវបានឆ្លើយតបភ្លាមៗពីអ្នកដែលការពារកីឡាករ Messi ដោយពួកគេអះអាងថា មិនមានអ្វីប្លែកនោះឡើយ ដែលអាវរបស់កីឡាបាល់ទាត់នៅលើឥដ្ឋបន្ទាប់ពីការប្រកួត។ ប្រធានរបស់ក្រុមអាហ្សង់ទីន Messi បានប្តូរអាវជាមួយកីឡាករ Andres Guardado របស់ក្រុមម៉ិកស៊ិក។
មនុស្សមួយចំនួនបានឆ្លើយតបទៅ Alvarez ដោយចង្អុលថា វីដេអូនេះមិនបានបង្ហាញថាកីឡាករ Messi កំពុងសម្អាតអ្វីនោះទេ ហើយក៏មិនឃើញមានទង់ជាតិម៉ិកស៊ិកនោះដែរ។ ប៉ុន្តែ Alvarez បានទទូចម្ដងជាពីរដងថា Messi បានប្រមាថប្រទេសម៉ិកស៊ិក។
លោក Sergio Aguero (Kun) ដែលជាអតីតខ្សែប្រយុទ្ធរបស់ក្រុមអាហ្សង់ទីន និងក្រុមមេឃខៀវ Manchester City បានបន្ថែមដល់ការជជែកដេញដោលនេះ ដោយឆ្លើយតបទៅ Alvarez តាមរយៈការសរសេរនៅលើ Twitter ថា៖ «លោក Canelo (Alvarez) កុំស្វែងរកលេស និងបញ្ហា អ្នកប្រហែលជាមិនដឹងអំពីបាល់ទាត់ និងអ្វីដែលកើតឡើងនៅក្នុងបន្ទប់ផ្លាស់ប្តូរនោះទេ។ អាវរបស់កីឡាករតែងតែនៅលើឥដ្ឋ បន្ទាប់ពីការប្រកួត ដោយសារញើស»។
Alvarez បានជាប់រវល់នឹងការលើកឡើងនូវទឡ្ហីករណ៍ជាច្រើននៅលើបណ្ដាញសង្គម Twitter ក្នុងនោះរួមមានទាំងអ្នកសារព័ត៌មានផងដែរ៕
