សេចក្តីរាយការណ៍ថ្មីបានឲ្យដឹងមកថា នៅដើមសប្តាហ៍នេះ រុស្ស៊ីបានដឹកប្រព័ន្ធមីស៊ីលប្រឆាំងយន្តហោះយ៉ាងហោចណាស់១៥គ្រឿង និងឧបករណ៍វិស្វកម្មជាច្រើនទៀតទៅដល់ប្រទេសបេឡារុស។
យោងតាមប្រព័ន្ធផ្សព្វផ្សាយឃ្លាំមើលយោធាឯករាជ្យបេឡារុស ឬហៅថា Belaruski Hajun ដកស្រង់បន្តចេញពីបណ្តាញសារ Telegram នៃសហគមន៍កម្មករផ្លូវដែកប្រទេសបេឡារុស បានឲ្យដឹងថា នៅថ្ងៃទី២៥ ខែវិច្ឆិកា ក្បួនរថយន្តរុស្ស៊ីបានចាកចេញពីស្ថានីយរថភ្លើង Yeysk នៃKrasnodar Krai សហព័ន្ធរុស្ស៊ី និងនៅថ្ងៃទី២៨ ខែវិច្ឆិកា សប្តាហ៍នេះ វាត្រូវបានគេមើលឃើញជាថ្មីនៅឯ Orsha-Centraljnaya (តំបន់ Vitebsk នៃសាធារណរដ្ឋបេឡារុស) ផ្ទេរផ្លូវទៅកាន់ស្ថានីយ Lisova ប្រទេសបេឡារុស។
តាមការឃ្លាំមើល ក្បួនរថយន្តមានផ្ទុកប្រព័ន្ធមីស៊ីលប្រឆាំងយន្តហោះស៊េរី Tor-M2 យ៉ាងហោចណាស់ ១៥ គ្រឿង និងឧបករណ៍វិស្វកម្មចំនួន ១០ គ្រឿងផ្សេងទៀត។
យោងតាមការលួចបង្ហើបប្រាប់ពីកម្មករផ្លូវដែកបេឡារុស “ការដឹកជញ្ជូនទំនិញប្រភេទនេះមិនមែនជាក្បួនគ្រឿងបរិក្ខារយោធាចុងក្រោយដែលរុស្ស៊ីដឹកមកកាន់បេឡារុសនោះទេ” ដែលមានន័យថា រុស្ស៊ីតែងតែដឹកទៅមកក្នុងអំឡុងសង្រ្គាមនៅអ៊ុយក្រែន៕
ប្រភព៖ Pravda
ប្រភពរូប៖Pravda
ប្រែសម្រួល៖សុខ តុលា