គ្រាប់បាល់នៅចុងម៉ោង ដែលស៊ុតបញ្ចូលទីដោយកីឡាករ Niclas Fuellkrug បានធ្វើឱ្យក្រុមជម្រើសជាតិអាល្លឺម៉ង់ តាមស្មើ ១-១ ជាមួយក្រុមអេស្ប៉ាញ សម្រាប់ការប្រកួត ក្នុងព្រឹត្តិការណ៍ World Cup កាលពីថ្ងៃអាទិត្យ ដែលលទ្ធផលនេះ នាំឱ្យក្តីសង្ឃឹមរបស់ក្រុមគីឡូធ្ងន់ទាំង ២ ក្នុងការបានឡើងទៅវគ្គ ១៦ក្រុមចុងក្រោយ ស្ថិតក្នុងភាពប្រទាញប្រទង់។
ការបញ្ចប់ទីស្អាតអស្ចារ្យរបស់ខ្សែប្រយុទ្ធ Alvaro Morata បានជួយឱ្យក្រុមអេស្ប៉ាញស្ថិតក្នុងដំណើរផ្លូវឆ្ពោះទៅកាន់វគ្គចាញ់ធ្លាក់ ដោយការឆ្លងផុតពីពូល E ប៉ុន្តែកីឡាករ Jamal Musiala និង Fuellkrug បានសហការគ្នា ដើម្បីបំផ្លាញឱកាសរបស់ក្រុមគូបដិបក្ខ ក៏ដូចជាស្ដារក្ដីសង្ឃឹម និងមោទនភាពរបស់ក្រុមអាល្លឺម៉ង់ខ្លះៗឡើងវិញ។
ការទទួលបានជ័យជម្នះដ៏គួរឱ្យភ្ញាក់ផ្អើលរបស់ក្រុមកូស្តារីកាលើក្រុមជប៉ុន ក្នុងហ្គេម នៅមុននោះ បានបន្ធូរបន្ថយសម្ពាធខ្លះ ចំពោះក្រុមឥន្ទ្រីអាល្លឺម៉ង់ បន្ទាប់ពីពួកគេបានចាញ់ក្រុមលំដាប់កំពូលរបស់តំបន់អាស៊ីយ៉ាងគួរឱ្យភ្ញាក់ផ្អើល ក្នុងការប្រកួតបើកឆាក ប៉ុន្តែពួកគេមិនអាចប្រើប្រាស់ប្រយោជន៍រយៈពេលឱ្យបានច្រើន ក្នុងការប្រជែងដណ្តើមបាល់ជាមួយក្រុមអេស្ប៉ាញនោះឡើយ។
ក្រុមម្ចាស់ជើងឯកពិភពលោក ៤សម័យកាល បានរងនូវភាពអាម៉ាស់ ដោយការធ្លាក់ត្រឹមវគ្គចែកពូល នៅប្រទេសរុស្ស៊ី កាលពី ៤ឆ្នាំមុន ហើយការស៊ុតរបស់កីឡាករ Morata ក្នុងការប្រកួត នៅកីឡដ្ឋាន Al Bayt បានធ្វើឱ្យពួកគេប្រឈមនឹងរូបភាពនេះម្ដងទៀត ប៉ុន្តែការទម្លុះសំណាញ់ទីយ៉ាងល្អអស្ចារ្យរបស់ខ្សែប្រយុទ្ធ Fuellkrug របស់ក្រុម Werder Bremen បានជួយដណ្ដើម ១ពិន្ទុដ៏មានតម្លៃ។
ពេលនេះ ក្រុមអេស្ប៉ាញ នាំមុខគេ ក្នុងពូល E ដោយមាន ៤ ពិន្ទុ តាមពីក្រោយដោយក្រុមជប៉ុន និងកូស្តារីកា ដែលមាន ៣ពិន្ទុដូចគ្នា ខណៈក្រុមអាល្លឺម៉ង់មាន ១ពិន្ទុ ជាមួយនឹងការនៅសល់ ១ហ្គេមចុងក្រោយ៕