អ៊ុយក្រែននិយាយថា បានឃើញសញ្ញាថ្មី មានតម្រុយថ្មីហើយ ខណៈទ័ពរុស្ស៊ីកំពុងរៀបចំចាកចេញពីរោងចក្រថាមពលនុយក្លេអ៊ែរ Zaporizhzhia។
នេះដោយយោងតាមសំដីរបស់ប្រធានក្រុមហ៊ុនថាមពលនុយក្លេអ៊ែរ គ្រប់គ្រងដោយរដ្ឋរបស់អ៊ុយក្រែនផ្ទាល់ គឺលោក Petro Kotin។ លោកបានមានប្រសាសន៍ថា “ក្នុងរយៈពេលប៉ុន្មានសប្តាហ៍ថ្មីៗនេះ លោកបានទទួលព័ត៌មានយ៉ាងមានប្រសិទ្ធភាព និងច្បាស់ការណ៍ អំពីសញ្ញាដែលថារុស្ស៊ីកំពុងរៀបចំខ្លួនចាកចេញពីរោងចក្រ”។ មន្រ្តីជាន់ខ្ពស់រូបនេះបានបន្តប្រាប់លម្អិតថា បច្ចុប្បន្នរុស្ស៊ីមិនទាន់ចេញទេ វាមិនលឿនពេកទេដែលពួកគេនឹងចេញនោះ តែពិតណាស់ពួកគេកំពុងរៀបចំផែនការដកខ្លួនចេញ ដោយប្រហែលជានឹងប្រគល់រោងចក្រនេះទៅឲ្យភ្នាក់ងារអន្តរជាតិអាតូមិក។
យ៉ាងណាក៏ដោយ ការបញ្ជាក់ផ្លូវការពីខាងរុស្ស៊ីមិនទាន់ត្រូវបានធ្វើឡើងនោះទេ ខណៈអ៊ុយក្រែនក៏បានចោទទាហានរុស្ស៊ីបន្ថែមទៀតពីការចូលលួចរបស់របរគ្រប់យ៉ាងក្នុងរោងចក្រមុននឹងចាកចេញ។
គួររំលឹកឡើងវិញថា រោងចក្រថាមពលនុយក្លេអ៊ែរZaporizhzhia គឺជារោងចក្រនុយក្លេអ៊ែរធំបំផុតប្រចាំអឺរ៉ុប។ វាត្រូវបានរុស្ស៊ីវាយដណ្តើមនិងកាន់កាប់កាលពីដើមដំបូងនៃ សង្រ្គាម។ ទាំងភាគីរុស្ស៊ីនិងអ៊ុយក្រែន បានស្តីបន្ទោសដាក់គ្នាជាប់មករហូតចំពោះការបាញ់ផ្លោងដាក់រោងចក្រនេះ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា