ប្រទេសអាល្លឺម៉ង់នៅថ្ងៃចន្ទនេះបានរៀបចំរួចរាល់អស់ហើយ និងត្រៀមដឹករថយន្ត រថពាសដែកប្រយុទ្ធរាប់សិបគ្រឿងថ្មីទៅអ៊ុយក្រែនតាមការសន្យារបស់ខ្លួនកាលពី សប្តាហ៍មុន។
នេះដោយយោងតាមការលើកឡើងរបស់រដ្ឋាភិបាលអាល្លឺម៉ង់ក្នុងសេចក្តីថ្លែងការណ៍មួយដែលបានចុះផ្សាយនៅលើគេហទំព័រនៅថ្ងៃចន្ទ ទី២៨ ខែវិច្ឆិកា។ ជំនួយដែលគ្រោងនឹង ចេញដំណើរដឹកទៅអ៊ុយក្រែនរួមមានលម្អិតដូចជា៖ រថយន្តសម្រាប់សណ្តោង ដឹកជញ្ជូន រថក្រោះខ្នាតធំចំនួន ២ គ្រឿង ស៊េរី M1070 Oshkosh ជាប្រភេទដូចគ្នាដែលធ្លាប់ដឹកទៅ ចំនួន៨គ្រឿងកាលពីពេលកន្លងទៅ និងរថពាសដែកថ្មី១៤គ្រឿងសម្រាប់ផ្តល់ជូន ឆ្មាំការពារ ព្រំដែនអ៊ុយក្រែន។ បើតាមកាសែតជាតិអ៊ុយក្រែន រថពាសដែកព្រំដែនប្រភេទនេះ ទាំងអស់គឺមានចំនួន៥៣គ្រឿងហើយដែលសុទ្ធសឹងតែផ្តល់ជូនដោយសម្ព័ន្ធមិត្តអាល្លឺម៉ង់។
គួរជម្រាបថា តម្លៃសរុបនៃអាជ្ញាប័ណ្ណចេញដោយរដ្ឋាភិបាលសហព័ន្ធសម្រាប់ការនាំចេញ ទំនិញយោធារបស់អាល្លឺម៉ង់ក្នុងរយៈពេលចាប់ពីថ្ងៃទី១ ខែមករា ឆ្នាំ ២០២២ ដល់ថ្ងៃទី ២១ ខែវិច្ឆិកា ឆ្នាំ ២០២២ គឺមានចំនួន ១.៦៣៦ ពាន់លានអឺរ៉ូហើយ ដែលមានន័យថា អាល្លឺម៉ង់បាននាំចេញជំនួយទៅអ៊ុយក្រែនគិតជាដុល្លារអាម៉េរិកគឺប្រហែលជាង១.៦៩៦ពាន់លានដុល្លារ៕
ប្រភព៖ Pravda
ប្រភពរូប៖Pravda
ប្រែសម្រួល៖សុខ តុលា