ក្រុមម្ចាស់ផ្ទះកាតា បានធ្លាក់ចេញពីការប្រកួតប្រជែង ក្នុងព្រឹត្តិការណ៍ World Cup 2022 ហើយ កាលពីថ្ងៃសុក្រ បន្ទាប់ពីរងបរាជ័យ ២លើកជាប់ៗគ្នា ខណៈដែលក្រុមតោកំណាចអង់គ្លេស បានបាត់បង់ឱកាស ក្នុងការដណ្ដើមសិទ្ធិទៅវគ្គ ១៦ក្រុមចុងក្រោយ បន្ទាប់ពីលេងស្មើ ០-០ ជាមួយក្រុមអាមេរិក។
ក្រុមជម្រើសជាតិកាតា បានប្រកួតចាញ់ក្រុមសេណេហ្គាល់ ៣-១ ហើយបានក្លាយជាក្រុមដំបូងគេ ដែលត្រូវហាលអាវ (ធ្លាក់) នៅ World Cup នេះ បន្ទាប់ពីការប្រកួត ក្នុងពូល A ជាមួយគ្នា រវាងក្រុមហូឡង់ និងអេក្វាទ័រ ស្មើគ្នា ១-១។
ក្រុមកាតា ដែលជាម្ចាស់ជើងឯកទ្វីបអាស៊ី មានសង្ឃឹមខ្ពស់សម្រាប់ការប្រកួតប្រជែងនេះ ប៉ុន្តែក្លាយជាក្រុមម្ចាស់ផ្ទះទី២ ដែលត្រូវបញ្ចប់ដំណើរត្រឹមវគ្គចែកពូលបន្ទាប់ពីក្រុមជម្រើសជាតិអាហ្វ្រិកខាងត្បូង កាលពីឆ្នាំ២០១០។ គ្រាប់បាល់ពីកីឡាករ Boulaye Dia, Famara Diedhiou និង Bamba Dieng គឺគ្រប់គ្រាន់ផ្តល់ជ័យជម្នះឱ្យក្រុមសេណេហ្គាល់ ដែលជាជើងឯករបស់ទ្វីបអាហ្រ្វិក។
កីឡាករ Mohammed Muntari បានស៊ុតបញ្ចូលទីគ្រាប់បាល់តែ១គ្រាប់គត់ឱ្យកាតា នៅ World Cup រហូតមកដល់ពេលនេះ ក្នុងការបង្ហាញខ្លួនលើកដំបូងជាមួយនឹងខកចិត្តយ៉ាងធំធេង នៅលើឆាកប្រកួតប្រជែងដ៏ធំបំផុតរបស់កីឡាបាល់ទាត់ ដោយវាគឺជាលើកទី១ ហើយ ដែលប្រទេសម្ចាស់ផ្ទះរៀបចំ World Cup បានធ្លាក់ចេញ បន្ទាប់ពី ២ហ្គេម។
នៅពូល A នេះ ក្រុមហូឡង់របស់លោក Louis van Gaal ដែលមាន ៤ពិន្ទុ នឹងឡើងទៅកាន់វគ្គ ១៦ក្រុមចុងក្រោយជាមួយនឹងលទ្ធផលស្មើជាមួយក្រុមកាតា ក្នុងការប្រកួតចុងក្រោយរបស់ពួកគេ។ ដោយឡែកក្រុមសេណេហ្គាល់ ត្រូវតែយកឈ្នះក្រុមអេក្វាទ័រ ដើម្បីបានធ្វើដំណើរទៅវគ្គបន្ត។
បន្ទាប់ពីយកឈ្នះអ៊ីរ៉ង់យ៉ាងចាស់ដៃ ៦-២ ក្នុងការប្រកួតបើកឆាករបស់ពួកគេ ក្រុមអង់គ្លេស ដែលមានទម្រង់លេងសោះកក្រោះ បានភ្លាត់ស្នៀតស្មើជាមួយក្រុមអាមេរិក ហើយត្រូវបានស្រែកហ៊ោចំអក នៅពេលចប់ម៉ោងនៃការប្រកួត។
ក្រុមរបស់លោក Gareth Southgate នឹងត្រូវធានា ក្នុងការបានឡើងទៅវគ្គបន្តពីពូល B របស់ខ្លួន ជាមួយនឹងជ័យជម្នះ ប៉ុន្តែក្នុងហ្គេមនេះ ក្រុមយក្សទៅពីអឺរ៉ុបមួយនេះ សឹងតែមិនបានបង្កបញ្ហាអ្វីដល់ក្រុមអាមេរិក ដែលលេងដោយមានការប្តេជ្ញាចិត្តយ៉ាងខ្លាំង។
ក្រុមអង់គ្លេសត្រូវតែចៀសឱ្យផុតពីការចាញ់ក្រុមជិតខាងវេលស៍ ក្នុងលទ្ធផល ៤គ្រាប់ នៅថ្ងៃអង្គារ ដើម្បីអាចទៅវគ្គបន្ត ហើយដឹងច្បាស់ថា ជ័យជម្នះនឹងបញ្ជូនពួកគេទៅវគ្គ ១៦ក្រុម ក្នុងនាមជាប្រធានពូល។
សម្រាប់ក្រុមអ៊ីរ៉ង់ ២គ្រាប់ នៅក្នុងម៉ោងបន្ថែមមានរបួស បានជួយឱ្យឈ្នះក្រុមវេលស៍ ២-០ ដោយជ័យជម្នះនេះ មិនត្រឹមតែស្ដារកម្លាំងចិត្តពីបរាជ័យយ៉ាងអាម៉ាស់ ក្នុងហ្គេមបើកឆាកប៉ុណ្ណោះទេ តែថែមទាំងជួយផ្ដល់ក្ដីសង្ឃឹម ក្នុងការបានឆ្លងទៅវគ្គបន្ទាប់ទៀតផង ខណៈដែលពួកគេធ្វើយុទ្ធនាការ នៅ World Cup នេះ ជាមួយនឹងការគ្របដណ្ដប់នៃការតវ៉ាយ៉ាងធំប្រឆាំងនឹងរដ្ឋាភិបាល នៅក្នុងប្រទេសរបស់ខ្លួន៕