ដោយឡែកចំពោះចក្រភពអង់គ្លេសវិញ នៅចុងសប្តាហ៍នេះបានសន្យាថានឹងផ្តល់ជំនួយថវិកាសរុបជិត១០លានដុល្លារបន្ថែមទៀតដល់អ៊ុយក្រែន សម្រាប់ការជួសជុលថាមពល និងគ្រាប់ធញ្ញជាតិ។
សេចក្តីថ្លែងការណ៍ពីការិយាល័យរបស់រដ្ឋមន្រ្តីការបរទេសអង់គ្លេសបាននិយាយថា លោក James Cleverly រដ្ឋមន្រ្តីអង់គ្លេសបានធ្វើដំណើរទៅកាន់ប្រទេសអ៊ុយក្រែន ជួបជាមួយប្រធានាធិបតី Zelenskyy និងរដ្ឋមន្ត្រីការបរទេស Dmytro Kuleba ។ ក្នុងដំណើរនោះ Cleverly បានប្រកាសពីការប្តេជ្ញាចិត្តថ្មីផ្តល់ជំនួយថ្មីដល់អ៊ុយក្រែន។ ជំនួយដែលត្រូវបានកំណត់គឺ ៣ លានផោន (៣,៦ លានដុល្លារ) ដើម្បីជួយកសាងឡើងវិញនូវហេដ្ឋារចនាសម្ព័ន្ធសំខាន់ៗ និង ៥ លានផោន (៦ លានដុល្លារ) ផ្សេងទៀតសម្រាប់គំនិតផ្តួចផ្តើមដឹកជញ្ជូនគ្រាប់ធញ្ញជាតិអ៊ុយក្រែនទៅកាន់ប្រទេសនានាដែលកំពុងមានហានិភ័យនៃភាពអត់ឃ្លាន។
សេចក្តីថ្លែងការណ៍បាននិយាយថា “ការគាំទ្ររបស់យើងនឹងបន្តដរាបណាអ៊ុយក្រែនត្រូវការដើម្បីអាចឲ្យប្រទេសនេះងើបឡើងវិញ”។ Cleverly ក៏បានថ្កោលទោសរុស្ស៊ីចំពោះ “ការវាយប្រហារយ៉ាងព្រៃផ្សៃ” លើជនស៊ីវិល មន្ទីរពេទ្យ និងហេដ្ឋារចនាសម្ព័ន្ធថាមពលផងដែរ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា