ភ្នំពេញ៖ ឧកញ៉ា ចាន់ សុឃាំង ដែលទើបជាប់ជាប្រធានសហព័ន្ធស្រូវអង្ករអាណត្តិទី៤ បានប្តេជ្ញាចិត្តលះបង់ពេលវេលា ជំរុញវិស័យស្រូវអង្ករឱ្យកាន់តែរីកចម្រើន និងជំរុញការនាំចេញអង្ករឱ្យបានមួយលានតោននៅក្នុងឆ្នាំ២០២៥ខាងមុខនេះ។
អគ្គនាយកក្រុមហ៊ុន Signature of Asia ដែលជាក្រុមហ៊ុននាំចេញអង្ករទៅទីផ្សារអន្តរជាតិ រូបនេះ បានបន្ថែមថា៖ ក្នុងអាណត្តិរបស់ លោក សហព័ន្ធស្រូវអង្ករកម្ពុជានឹងផ្តោតទៅលើការងារ៤ចំណុចធំៗគឺ ដោះស្រាយបញ្ហាពូជស្រូវឡើងវិញ ដើម្បីធ្វើឱ្យអង្ករមានភាពសុទ្ធល្អ និងមានគុណភាពដែលជំរុញការនាំចេញឱ្យមាននិរន្តភាពសិក្សាពង្រីកទីផ្សារគោលដៅដែលបានកំណត់ទុក និងលើកទឹកចិត្តឱ្យមានសហគមន៍មួយ រោងម៉ាស៊ីនមួយនៅក្នុងតំបន់មួយ និងបង្កើនឱ្យមានអភិបាលកិច្ចល្អនៅតាមសហគន៍។
សូមជម្រាបថា៖នៅថ្ងៃទី២៣ខែវិច្ឆិកាឆ្នាំ២០២២ សហព័ន្ធស្រូវអង្ករកម្ពុជារៀបចំកម្មវិធីមហាសន្និបាតនិងការបោះឆ្នោតជ្រើសតាំងប្រធាននិងក្រុមប្រឹក្សាភិបាលសម្រាប់អាណត្តិទី៤ នាថ្ងៃទី២៣ ខែវិច្ឆិកា ឆ្នាំ២០២២នេះ ដោយជ្រើសបានសមាជិកសហព័ន្ធចំនួន២៥រូប ដែលក្នុងនោះ ប្រធានសហព័ន្ធស្រូវអង្ករមួយរូបគឺឧកញ៉ា ចាន់ សុឃាំងនិងប្រធានក្រុមប្រឹក្សាភិបាលចំនួនមួយរូបគឺឧកញ៉ា សុង សារ៉ ន និង និងសហគមន៍ចំនួន៣រូបដែលជ្រើសតាំងដោយសហគមន៍។ការបោះឆ្នោតជ្រើសតាំងប្រធានក្រុមប្រឹក្សាភិបាលនិងប្រធានសហព័ន្ធ ស្រូវអង្ករសម្រាប់អាណត្តិនីមួយៗធ្វើឡើងរយៈពេល៣ឆ្នាំម្តង៕ដោយៈសិរីមតី
