ភ្នំពេញ៖ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា៖រដ្ឋាភិបាលនឹងជំរុញការនាំចេញអង្ករនៅឆ្នាំ២០២៣ ឱ្យបានបរិមាណចំនួន ៧៥ម៉ឺនតោន និង១លានតោននៅក្នុងឆ្នាំ២០២៥ ដែលក្នុងនោះត្រូវនាំចេញក្រោមរូបភាពក្រុមហ៊ុនឯកជននីមួយៗ និងក្រុមហ៊ុនរួមគ្នា (CRF-EXPORT CONSORTIUM) ដែលនាំចេញក្នុងបរិមាណទ្រង់ទ្រាយធំ តាមរយៈការរៀបចំផែនការយុទ្ធសាស្ត្រទីផ្សារគោលដៅ ស្របតាមប្រភេទពូជស្រូវ និងអង្ករ។
រដ្ឋមន្ត្រីក្រសួងពាណិជ្ជកម្មលើកឡើងបែបនេះ ក្នុងឱកាសអញ្ជើញចូលរួម ក្នុងសន្និបាតបូកសរុបការងារឆ្នាំ២០២២ និងលើកទិសដៅការងារឆ្នាំ២០២៣ របស់សហព័ន្ធស្រូវអង្ករកម្ពុជា នារសៀលថ្ងៃទី២៣ ខែវិច្ឆិកា ឆ្នាំ២០២២។
លោករដ្ឋមន្ត្រី មានប្រសាសន៍ថា សម្រាប់អាណត្តិទី៤នេះ ក្រោមកិច្ចសម្របសម្រួលរបស់ក្រសួងពាណិជ្ជកម្មដែលជាអាណាព្យាបាលបច្ចេកទេស សហព័ន្ធស្រូវអង្ករបានដាក់ចេញនូវផែនការរបស់ខ្លួន ដោយផ្តោតលើសរសរស្តម្ភចំនួន ៤ ទី១. អភិបាលកិច្ច៖ បន្តពង្រឹងអភិ បាលកិច្ចរបស់ខ្លួនឱ្យកាន់តែប្រសើរឡើងប្រកបដោយការទទួលខុសត្រូវនិងគណនេយ្យភាព។ទី២.ជំរុញផលិតកម្មពូជស្រូវ៖បន្តនិងចូល រួមសហការជាមួយក្រសួងកសិកម្ម រុក្ខាប្រមាញ់ និងនេសាទ ក្នុងគោលនយោបាយជំរុញការផលិតពូជស្រូវនិងចែកចាយដល់ប្រជាកសិ ករ និងធ្វើកិច្ចសន្យាកសិកម្ម ដើម្បីធានាបាននូវតម្លៃស្រូវ។ទី៣. ទីផ្សារ៖ ជំរុញការនាំចេញ ដោយរៀបចំផែនការយុទ្ធសាស្ត្រទីផ្សារគោល ដៅស្របតាមប្រភេទពូជស្រូវនិងអង្ករដែលកំណត់យកឆ្នាំ២០២៣ ឱ្យបានបរិមាណចំនួន៧៥ម៉ឺនតោននិង១លានតោននៅក្នុងឆ្នាំ២០២៥ដែលក្នុងនោះត្រូវនាំចេញក្រោមរូបភាពក្រុមហ៊ុនឯកជននីមួយៗ និងក្រុមហ៊ុនរួមគ្នា (CRF-EXPORT CONSORTIUM) ដែលនាំចេញក្នុងបរិមាណទ្រង់ទ្រាយធំនិងទី៤. ការស្រាវជ្រាវ និងអភិវឌ្ឍន៍៖រៀបចំឱ្យមានមូលនិធិឯកជនរបស់សហព័ន្ធស្រូវអង្ករបន្ថែម ដើម្បីស្រាវ ជ្រាវ អភិវឌ្ឍន៍លើប្រភេទពូជស្រូវ ដែលអាចឆ្លើយតបការប្រែប្រួលបរិយាកាស ទីផ្សារ និងទិន្នផល។បន្តជំរុញការប្រើប្រាស់បច្ចេក វិទ្យាសម្រាប់ការដាំដុះ ការកិនកែច្នៃ និងជំរុញឱ្យមានស្តង់ដារតម្រូវគ្រប់ប្រភេទរបស់រោងម៉ាស៊ីនកិនស្រូវក្នុងការនាំចេញ។
សហព័ន្ធស្រូវអង្ករកម្ពុជា ត្រូវបានបង្កើតឡើងក្រោមកិច្ចប្រឹងប្រែងសម្របសម្រួលរបស់ក្រសួងពាណិជ្ជកម្ម នៅឆ្នាំ២០១៤ ហើយបាន ទទួលស្គាល់ដោយរាជរដ្ឋាភិបាល តាមរយៈអនុក្រឹត្យលេខ២២៨ អនក្រ.បក ចុះថ្ងៃទី៨ ខែសីហា ឆ្នាំ២០១៤ ដោយស្ថិតក្រោមអាណា ព្យាបាលបច្ចេកទេសរបស់ក្រសួងពាណិជ្ជកម្ម ដែលជាដៃគូរាជរដ្ឋាភិបាលតែមួយគត់ក្នុងការអនុវត្តគោលនយោបាយស្តីពីការជំរុញផលិតកម្មស្រូវ និងការនាំចេញអង្ករ ដែលរហូតដល់ពេលនេះមានរយៈពេល ៩ឆ្នាំ។ សម្រាប់អាណត្តិទី៣ ដែលបានបោះឆ្នោតរៀបចំថ្នាក់ ដឹកនាំ នៅថ្ងៃទី៨ ខែសីហា ឆ្នាំ២០១៩ ដែលមានការកែសម្រួលរចនាសម្ព័ន្ធថ្នាក់ដឹកនាំ ដោយមានការបែងចែកការងារប្រតិបត្តិ និងការ ត្រួតពិនិត្យ (Check and Balance) ដែលមានប្រធានសហព័ន្ធដែលជាតួអង្គដឹកនាំការងារប្រតិបត្តិ ដឹកនាំដោយឧកញ៉ា សុង សារ៉ន និងក្រុមប្រឹក្សាភិបាល ដែលមានសមាភាពសរុបចំនួន ២៥រូប ដែលមានប្រធានដឹកនាំដោយ ឧកញ៉ា ហ៊ុន ឡាក់ ថ្ងៃនេះជាថ្ងៃចុងក្រោយ នៃអាណត្តិទី៣ ក៏ជាថ្ងៃចាប់ផ្តើមនៃអាណត្តិទី៤៕ដោយៈសិរីមតី
