សៀមរាប៖ អគ្គនាយកនៃអាជ្ញាធរជាតិអប្សរានិងស្ថានទូតបារាំងដែលជាសហប្រធាននៃគណៈកម្មការជួសជុលប្រាសាទមេបុណ្យខាងលិច បានដឹកនាំក្រុមអ្នកបច្ចេកទេសគម្រោងជួសជុលប្រាសាទមេបុណ្យខាងលិច ជួបប្រជុំពិភាក្សានៅឯការដ្ឋានជួសជុលប្រាសាទមេបុណ្យខាងលិចផ្ទាល់ កាលពីព្រឹកថ្ងៃទី២២ ខែវិច្ឆិកា ឆ្នាំ២០២២ ។
ការជួបប្រជុំក្រុមអ្នកបច្ចេកទេសនេះ គោលបំណងគឺដើម្បីតាមដាននិងពិនិត្យវឌ្ឍនភាពការងារជួសជុលប្រាសាទមេបុណ្យខាងលិចនាពេលកន្លងមក ជាមួយនឹងការរៀបចំទិសដៅ ជាបន្តទៀតអំពីផែនការសកម្មភាពជួសជុល អភិរក្សប្រាសាទមេបុណ្យខាងលិចនៅឆ្នាំ២០២៤ ខាងមុខ។
កិច្ចប្រជុំនេះបានប្រព្រឹត្តទៅដោយមានការចូលរួមពីឯកឧត្តម បណ្ឌិត ហង់ ពៅ អគ្គនាយកអាជ្ញាធរជាតិអប្សរា លោក Pierre Vincent ទីប្រឹក្សាវប្បធម៌ និងសហប្រតិបត្តិការនៃស្ថានទូតបារាំង ក្នុងនាមជាសហប្រធាននៃក្រុមការងារបច្ចេកទេសដឹកនាំគម្រោងជួសជុលប្រាសាទមេបុណ្យខាងលិច និងទីប្រឹក្សាក្រសួងវប្បធម៌និងវិចិត្រសិល្បៈនិងក្រុមអ្នកបច្ចេកទេសជាច្រើននាក់ផង។
ប្រាសាទមេបុណ្យខាងលិច ជាប្រាសាទបុរាណ ដែលមានទីតាំងស្ថិតនៅលើដីទួលមួយកន្លែង ចំកណ្តាលបារាយណ៍ខាងលិច នៃអតីតក្រុងអង្គរ ។ ប្រាសាទនេះបានស្ថាបនាឡើងនៅអំឡុងពាក់កណ្តាលសតវត្សទី១១ នៃគ្រិស្តសករាជ ក្នុងរាជ្យព្រះបាទឧទយាទិត្យវរ្ម័នទី២ (ឆ្នាំ១០៤៩-១០៦៦) ដើម្បីឧទ្ទិសចំពោះបុព្វការីជនរបស់ព្រះអង្គ។ ប្រាសាទនេះមានលក្ខណៈប្លែកពិសេស គឺសំណង់ប្រាសាទបានផ្គុំឡើងដោយកំពែងមួយជាន់ធ្វើអំពីថ្មភក់ ហ៊ុមព័ទ្ធស្រះទឹកធំមួយដែលគេជីកនៅលើដីទួល។
នៅក្នុងបរិវេណប្រាសាទមេបុណ្យខាងលិចនោះ មានប្រាសាទតូចៗចំនួន១២និងមានរានហាល ដែលគេសង់ឡើងនៅកណ្ដាលស្រះទឹកមួយទៀតសម្រាប់ដាក់រូបព្រះវិស្ណុផ្ទុំ។ ក្នុងរយៈពេលជាង៣ឆ្នាំមកនេះ ក្រុមការងារបានប្រឹងប្រែងជួសជុលនិងដំឡើងតួប៉មប្រាសាទចំនួន៦ នៅមេបុណ្យខាងលិចដែលរលំបាក់បែក ឱ្យមានរូបរាងឡើងវិញ ហើយនៅពាក់កណ្ដាលឆ្នាំ២០២៣ខាងមុខ ដំណើរការដំឡើងនិងជួសជុលតួប៉មប្រាសាទទាំង៦នេះអាចនឹងបញ្ចប់ជាស្ថាពរ ។ចំណែកឯប្រាសាទតូចៗចំនួន៣ទៀតប្រសិនបើបន្ថែមកម្លាំងការងារនិងសម្ភារជួសជុលឱ្យបានច្រើនលើសពីពេលបច្ចុប្បន្ន គឺអាចនឹងបញ្ចប់ការដំឡើងនិងការជួសជុលនៅត្រឹមចុងឆ្នាំ២០២៤។
ចាប់តាំងពីឆ្នាំ២០១២រហូតមកដល់ឆ្នាំ២០១៨ អ្នកជំនាញរបស់ស្ថានទូតបារាំង បានមកសិក្សាម្ដងទៀត ដោយចាប់ផ្ដើមគូសប្លង់ ធ្វើទំនប់ទឹក ព្រមទាំងរើថ្មដែលបាក់បែកនិងជួសជុលប្រាសាទខ្លះ ។ នៅឆ្នាំ២០១៩ ក្រុមអ្នកជំនាញបុរាណវិទ្យារបស់អាជ្ញាធរជាតិអប្សរា បានសហការជាមួយស្ថានទូតបារាំង បានចាប់អនុវត្តគម្រោងជួសជុលជាទ្រង់ទ្រាយធំ រហូតមកដល់បច្ចុប្បន្ន៕